Tempotimor (Covalima)-Programa Mão-de-Obra Postu Administrativu (PEMOPA) hahú loke tan estrada foun ho kilómetru rua resin iha postu administrativo Fatululik, munisípiu Covalima.
Tuir administradór postu administrativu Fatululik, Elias da Cruz katak, programa Mão-de-Obra ba faze segundu traballadór kontinua servisu hanesan limpeza jerál no loke estrda foun iha postu Fatululik.
“Traballadór sira Mão-de-Obra nian kontinua servisu husi faze primeiru to’o faze segundu liu-liu iha postu ba to’o aldeia sira hanesan hamos valeta kuak no loke estrada foun ho kilómetru rua resin husi aldeia Liana’in ba aldeia Taroman,” dehan Administradór postu ne’e ba www.tempotimor.com liuhusi via telefone, Kinta (16/09).
Iha sorin seluk reprezentante xefe aldeia liana’in João da Cruz apresia ba governu liuhusi programa Mão-de-Obra, tamba halo postu administrativu Fatululik furak no iha benefísiu ba komunidade.
“Há’u reprezenta komunidade kontenti tebes ba programa ida ne’e, maske situsaun Covid-19 halo komunidade susar atu hetan osan, maibé ho programa ne’e fó servisu ba komunidade sira hodi hetan osan oitoan hodi bele sustenta nesesidade familia inklui halo aldeia sira moos ba to suku no postu, tanba liu husi limpeza jerál,” Hateten xefe aldeia ne’e.
Entertantu programa Mão-de-Obra ne’ebé fó oportunidade ba comunidade sira hodi servisu ba nia aldeia no suku rasik ne’e, korajem tebes ba comunidade sira, nune’e orsamentu ne’ebé prevê ba konstrusaun estrada foun iha adleia Liana’in to’o Taroman hamutuk rihun $25.000.00 dollares amerikanu.(*)
