Tempotimor (Covalima)-Haree ba tempu ne’ebé atu hakaat ona ba udan monu rai nian, mak tékniku Guarda Floresta Covalima (GFC) hahú dezenvolve floresta komunitária iha postu administrativu, atu nune’e bele distribui ba komunidade sira.
Xefe Departamentu Teritoriál Floresta Munisipiu Covalima, Francisco Sarmento katak, dadaun ne’e floresta Covalima prepara hela viveirus komunitaria (Ai-oan) atu fornese ba komunidade iha postu Fatumea, Fatululik, Fohorem, Maukatar no Zumalai hodi nune’e bele kuda rasik iha sira-nia to’os hodi proteze rai iha tempu udan.
“Objetivu ne’e atu fornese viveirus ba komunidade sira para sira bele kuda iha sira-nia to’os, inklui haree rai sira ne’ebé halai, maibé labele iha fatin mamuk tanba dalaruma bele estraga fali,” dehan Francisco iha nia knaar fatin. Horseik (16/09).
Nia esplika, viveirus komunitáriu ne’ebé prepara hela atu distribui ba komunidade iha postu lima hamutuk rihun 70.000.
“Ai-oan ka viveirus komunitaria ne’ebé ami prepara ne’e, ba postu Fatumea 10.000, postu Fohorem 20.000, postu Fatululik 10.000, postu Maukatar 10.000, no postu Zumalai 20.000, ne’ebé ai-oan hirak ne’e maka prepara atu fornese ba komunidade sira para sira bele kuda iha sira-nia to’os no iha fatin ne’ebé seguru,” nia tenik.
Xefe Departamentu ne’e akresenta, ai-oan ne’ebé atu distribui ba komunidade sira mak hanesan Ai-kakeu, ai-mahuni, ai-samatuku. Tanba ne’e iha fulan Dezembru to’o Janeiru 2022 sei distribui ba komunidade sira hodi kuda no kuidadu, tanba komunidade sira mak sei sai na’in ba viveiru sira ne’e hotu.(*)
