Tempotimor (Covalima)-Tuir Diretór Servisu Munisipál Jestaun Merkadu no Turizmu (SMJMT), Damião Amaral katak, maske fatin negosiante nian iha merladu laran iha, maibé ikus-ikus ne’e negosiante sira hadau malu faan fali iha trotoar leten.
Ba kestaun ne’e diretór afirma, iha tempu badak sei muda negosiante sira iha trotoar leten ba fali merkadu laran tanba hamosu engrafamentu iha estrada.
“Tempu besik ami sei halo asaun hamutuk ho seguransa sira, hodi muda sira ne’ebé faan sasan iha estrada ninin ka iha trotoar leten tama hotu ba iha merkadu laran, tanba estrada ne’e transporte públiku sira atu halo movimentu, entaun ida ne’e risku ba sira, depois faan modo fatin iha laran ne’e agora faan fali obralan ona, tanba sira-nia hanoin katak, faan iha oin ne’e maka iha oportunidade di’ak para kompradór atu sosa, tamba ne’e sira hadau malu iha trotoar leten,” dehan Damião iha salaun Administrasaun Munisipiu Covalima, Segunda (20/09).
Nia esplika, fatin ba vendedór sira iha merkadu Suai sei sufisiente, maibé sira maka laiha konsiénsia atu faan sasan iha merkadu laran.
“Ema sira ne’e faan nanis ona iha merkadu laran la’ós foun, sira-nia fatin iha laran iha hela, maibé agora mamuk, tanba sira hanoin katak faan iha oin ne’e maka oportunidade di’ak ema sosa lalais, tanba ne’e maka sira hadau loss oin ne’e,” Damião komenta.
Nia husu ba negosiante sira ne’ebé faan sasan iha trotoar leten atu ho konsiénsia muda hikas ba ida-idak nian fatin atu nune’e transporte públiku sira livre halo movimentu.(*)
