Tempotimor (Covalima)-Komandante Jerál Polísia Nasionál Timor-Leste (PNTL) Komisáriu Faustino da Costa ne’ebé akompaña husi Komandante Operasaun PNTL, Pedro Belo hala’o vizita ba Komandu PNTL Munisípiu Covalima hodi enkoraja membru sira kona-ba servisu asegurasaun povu husi Covid-19.
“Ita hotu hatene desde 27 marsu 2020, Timor-Leste afeitadu ho Covid-19 maka loron ida ne’e knaar no responsabilidade PNTL tenke asegura atividade sira liga ho pandemia Covid-19 nian liu-liu iha Sentru Integradu Jestaun Krize (SIJK), asegura Ministériu Saúde (MS) liu-liu sidadaun sira ne’ebé afetadu ho ho Covid-19, inklui asegura mós fronteira hodi prevene atividade ilegál sira,” dehan Komjer ba jornalista sira hafoin hala’o vizita ba Komandu PNTL Munisípiu Covalima, Tersa (21/09).
Komjer mós akresenta, iha vizita ne’e parte ida atu halo fiskalizasaun ba regra sira ne’ebé implementa, tuir protokolu Ministériu Saúde (MS) no Organizasaun Mundiál ba Saúde (OMS) nian ka lae.
Komisáriu mós subliña iha vizita ne’e halo observasaun mós ba postu vizilánsia sira ne’ebé instala ona iha fronteira.
“Vizita ida ohin ne’e vizita ba daruak nian, vizita dahuluk mak mai instala ona postu permanente balun iha fronteira, oras ne’e ita uza no funsiona ona, hanesan iha parte Balibo no postu administrativu Maucatar nomós postu temporáriu iha área Fatumea,” katak Nia.
Entretantu iha vizita ne’e, komandu jerál nasionál apoia mos komputadór ho marka HP unidade rua ba komandu PNTL Covalima ne’ebé unidade ida sei entrega ba Batallaun Ordem Públika (BOP) no unidade ida seluk sei entrega ba PNTL eskuadra postu Tilomar.
“Simbolikamente ohin ita distribui ekuipamentu imformátika hanesan komputadór tanba komputadór no printer ladi’ak barak, maibé ita tenta rezolve. La’ós de’it komputadór ne’e maibé ho printer sei entrega set ida kompletu, ne’ebé sei entrega hotu ba eskuadra sira hotu, unidade no sub-unidade destakadu sira hotu, ne’ebé kompra ho orsamentu PNTL 2021 nian hodi halo servisu, importante mak uza ho kuidadu,” katak Nia(*)
