Tempotimor (Covalima)-Ekipa Servisu Protesan Sivil no Jestaun Dezastre Naturais (ESPS-JDN) munisípiu Covalima disemina informasaun ba komunidade no konselu suku sira atu antisipa ba fenómena laniña, liu-liu ba komunidade sira ne’ebé hela iha area risku ba dezastre naturais.
Tuir Koordenadór Jestaun Dezastre Naturais, Quintino da Costa katak, komunidade sira ne’ebé hela iha fatin risku, antisipa antes, molok udan boot akontese iha fulan oin mai.
“Suku Cassabauk tarjeitu ba dezastre naturais, tanba ne’e ami mai atu fahe informasaun kona-ba laniña ka udan boot ne’ebé atu akontese iha fulan oin mai iha Timor-Leste,’’ dehan Quintino ba jornalista sira hafoin halo sosializasaun ba comunidade Cassabauk, Tersa (28/09).
Iha sorin seluk reprezentante administradór postu Tilomar, Dedianos Mau husu ba komunidade Cassabauk tenke atensaun tanba dezastre naturais akontese ita la espera.
“Komunidade sira ne’ebé hela iha fatin risku husu atu toma atensaun ba dezastre naturais, katak iha fulan oin mai udan boot atu akontese, tanba ne’e husu ita-boot sira tenke muda husi fatin risku, tanba udan boot no anin boot atu ami la avizu ba ita, mai ho derpenti, tanba ne’e mak husu ita hotu tenke atensaun,” Nia hatete.
Entretantu diseminasaun ba imformasaun laniña ne’e hetan partisipasaun máximu husi comunidade suku Cassabauk. Alende ne’e komunidade suku Cassabauk kompostu husi aldeia Colo-ama, Cawauman no Tabolo ne’ebé total populasaun hamutuk rihun 2.331.(*)
