Tempotimor (Covalima) Tuir xefe suku Datotolu, Postu Administrativu Fohorem, João Agustino Resi katak, triste ho veteranus balun influéncia komunidade sira hodi labele simu vasina Covid-19.
“Ha’u triste tebes tanba iha aldeia Natardik, suku Datotolu ne’e veteranus mak lakohi halo komunidade sira tuir vasina, sira la hatudu dalan di’ak ba komunidade sira, maibé sira autór fali ba komunidade sira lakohi simu vasina,” dehan xefe suku João ba jornalista sira iha Aldeia Natardik, Sesta (01/10).
Maske nune’e, xefe suku kontinua enkoraja komunidade sira para hakbesik aan ba postu vasina hodi simu vasina, atu nune’e bele dook husi virus.
“Ami hanesan governu nia liman-ain hatete ba komunidade sira, bei-beik ba bei-beik, komunidade atu hakarak maibé problema mak veteranus sira mak sai autór fali iha aldeia Natardik hodi dehan komunidade katak labele vasina,” katak Nia.
Hatán kestaun ne’e vise Ministru Edukasaun Juventude no Desportu (MEJD), Antonio Guterres promete sei hato’o ba kestaun ne’e ba ministériu relevante.
“Preokupasaun veteranus lakohi haruka komunidade simu vasina ne’e hau fila ba Dili, sei hato’o ba ministériu relevante iha ne’ebá, para haree asuntu ne’e, ne’ebé ha’u husu ba komunidade sira iha ne’e lalika tauk atu simu vasina no labele fiar média sosiál sira, maibé ita-boot sira obrigatóriu simu vasina,” Hateten Vice MEJD
Entertantu vizita vise MEJD nian hodi halo kompañia ba vasinasaun Covid-19 ne’e remata iha aldeia Natardik kontinua viajen ba suku Lactos no suku Fohorem Iha postu administrativu Fohorem. Alende ne’e komunidade iha suku Datotolu pursentu 75% mak simu ona vasina, hela pursentu 25% mak seidauk.(*)
