Tempotimor (Covalima)-Komunidade sira iha postu administrativu Fohorem husu Ministériu Edukasaun Juventude no Desportu (MEJD) atu transforma Eskola Sekundária Téknika Vokasionál (ESTV) iha postu Fohorem ba fali Eskola Sekundáriu Jerál Públika.
Tuir xefe Suku Fohorem Vila, Fernando Ferreira, iha tinan 2016 harii eskola refere la’ós Eskola Sekundária Téknika Vokasionál, maibé momentu ne’ebé MEJD atu muda eskola ne’e ba téknika vokasionál sein enkontru ho komunidade sira, tanba ne’e komunidade sira husu atu muda fali eskola ne’e ba sekundáriu jerál.
“Inisiu harii eskola ne’e, ba ensinu sekundáriu jerál la’ós téknika vokasionál, depois foin dadaun ita-nia ministériu edukasaun atu muda eskola ne’e ba téknika vokasionál laiha enkontru ruma ho ami komunidade sira, tanba ne’e maka ami husu MEJD tenke taka eskola ne’e no loke fali sekundáriu jerál, agora numeru estudante 40 resin de’it, ida tinan oin mai tan estudante laiha ona,” dehan xefe Suku ne’e ba jornalista sira iha Fohorem Vila, Sábadu (02/10).
Iha fatin hanesan, diretór ESTV Fohorem, Custódio do Rego katak, nia parte hein de’it desizaun husi Ministériu Edukasaun kona-ba transformasaun eskola refere ba sekundáriu jerál.
“Komunidade sira barak hakarak taka eskola ida ne’e, tanba uluk eskola ne’e sekundáriu jerál, agora polítika ministériu edukasaun nian muda fali ba téknika vokasionál, ne’e maka sira haruka oan sira la mai eskola iha ne’e, ne’ebé hanesan diretór iha eskola ne’e, há’u hein de’it desizaun husi ministériu edukasaun, atu muda fali ba eskola sekundáriu jerál ka oinsa, ne’ebé há’u hein desizaun husi sira,” katak Custódio.
Hatán ba preokupasaun komunidade nian ne’e, Vise MEJD, António Guterres afirma, atu hola desizaun hodi muda eskola refere ba sekundária jerál hein dadus husi diretór jerál, tanba molok ne’e sira rekolla ona dadus kona-ba eskola refere.
“Imi nia preokupasaun sira ne’e, iha semana kotuk ha’u-nia diretór jeral (DJ) mai foti dadus ona iha eskola ne’e, depois ha’u husu sira para hatama relatóriu mai ha’u hodi haree rezultadu, saida maka imi hakarak, ne’ebé ha’u sei hare relatóriu bainhira DJ fó mai ha’u, tanba uluk loke ho lei, agora muda mos ho lei,” dehan governante ne’e.
Enkuantu eskola téknika vokasionál iha fohorem ne’e iha de’it departamentu pekuária, maibé tuir kurikulum husi ESTV hamutuk 42 no profesór na’in 17 ne’ebé kompostu husi permanente na’in 9, kontratadu na’in 5, parsiál na’in tolu.(*)
