Tempotimor (Covalima)-Tuir diretór Servisu Agua no Saneamentu (SAS) Covalima, Castro Dodi Ramos katak, bazei aba dadus 2019 no 2020 komunidade Covalima maioria mak asesu ona bee-moos ho di’ak.
“Agora ami nafatin tuir dadus jerál husi tinan 2019 no 2020 hatudu katak, komunidade 75% mak asesu ona bee-moos ho di’ak, depois kona-ba dadus jerál 2021 nian seidauk iha, tanba pandemia Covid-19, entaun ami seidauk halo verifikasaun iha terrenu, ne’ebé ami nafatin kaer ba dadus husi tinan kotuk nian, maibé tuir ami nia observasaun iha área urbana 85% mak asesu ona bee-moos,” Hateten Diretór SAS iha nia servisu fatin ba www.tempotimor.com Tersa (05/10).
Nia afirma, dezafiu ne’ebé durante ne’e SAS hasoru mak menus rekursu bee-moos no ekipamentu ba mákina hodi halo manutensaun
“Mákina bee-moos ne’e menus tanba covalima depende klima, ne’ebé fulan agustu klaran hanesan ne’e ba fulan outobru bee-moos komesa menus, ne’ebé labele perkore, ami tenke halo oráriu iha parte urbana nian, ne’ebé durante ne’e bee sai tuir oróriu ne’ebé SAS iha, maibé depende klima, tanba agora tempu bailoron no udan ben mós menus, ne’ebé dalaruma atu fahe mós la tuir oráriu, entaun semana ida fahe bee-moos ba komunidade sira dala ida ka dala rua de’it,” Haktenik nia
Diretor ne’e akresenta, tékniku hodi halo manutensaun ba sistema perfurasaun bee-moos iha Covalima laiha, tanba ne’e, bainhira iha problema tenke halo karta ba nasionál hodi husu ajuda.
“Ami iha munisípiu ho ekipa sira iha ne’e identifika de’it, bainhira sistema perfurasaun bee ne’e avaria, ami tenke halo karta ba nasionál mak tekniku sira mai rezolve, tanba husi diretór sesante to’o agora laiha tékniku, ne’ebé durante la rezolve problema sistema bee ne’ebé avaria iha munísipiu Covalima. Maibé ha’u hato’o ona ba nasionál atu rekruta funsionáriu tékniku ida, maibé ate agora laiha responde ruma,” katak Nia.
Liga ba situasaun ne’e, SAS Covalima kontinua apelu ba komunidade área urbana liu-liu iha munisípiu Covalima atu uza bee-moos ho konsiénsia no kuidadu, tanba laiha materiál atu halo manutensaun ba bee-moos ne’ebé durante ne’e instala ona iha fatin-fatin.(*)
