Tempotimor (Covalima)-Baseia ba dekretu lei no. 4/2004 fó dalan ba diresaun Servisu Água no Saneamentu (SAS) munisípiu Covalima hodi hola desizaun ba komunidade ne’ebe la kumpri regras utiliza saniu hodi dada bee ho ilegal.
Tuir diretór SAS munisípiu Covalima, Castro Dodi Ramos katak, daduus balun hatudu katak, ema balun ne’ebé uza saniu hodi dada bee ilegál, maibé bainhira SAS hetan sei la tolera.
“Se ami SAS detekta duni sira balun utiliza saniu, maka ami sei la tolera ba sidadaun sira ne’e, tanba tuir dekretu lei no. 4/2004 autoriza ami atu tesi pipa no sei fó sansaun ba sidadaun sira no taka tan bee ba sidadaun ne’ebé uza saniu ilegál, maibe agora tinan ne’e seidauk hetan informasaun no laiha keixa ruma husi komunidade sira, karik ami hetan no komunidade sira hato’o keixa ba ami mak, ami ho ekipa tun direta tesi pipa no fó sansaun, selu multa tuir lei ne’ebé iha,” katak diretór SAS munisípiu Covalima, horseik (06/10).
Diretór ne’e mós husi ba comunidade sira atu uza bee ho konxiénsia no labele uza saniu hodi estraga no hasusar maluk seluk iha tempu bailoron.
“Husu ba komunidade sira labele uza mákina saniu ne’e, tanba ema barak halerik ba bee-moos nomós ita rekursu menus ba bee, tenke kuida no fó tempu ba malu, tanba agora mákina ida de’it mak funsiona, seluk la funsiona tanba bee parte husi postu Maucatar parte lakirin agora la mai, tanba bee menus, ne’ebé agora dadaun ita uza de’it makina ida hodi atende ba ita boot sira,” Haktenik nia.(*)
