Infraestrutura Báziku Iha Ucekai Hakdasak, MOP Salvadór: “Salva Uluk Imi-Nia Vida”

Ministru MOP enkoraja Komunidade Ucekai kona-ba partisipasaun vasina kontra Covid-19. Kinta (07/10). Foto Tempo Timor

Tempotimor (Covalima)-Hafoin Ministru Obras Públika (MOP), Salvadór Eugénio Soares dos Reis Pires hala’o kampaña vasina nian iha postu administrativu Zumalai, maka xefe suku Ucekai, António da Silva apresenta preokupasaun kona-ba infraestrutura báziku iha suku Ucekai no Mape, maibé Ministru MOP husu comunidade salva aan lai molok hanoin ba dezenvolvimentu.

Preokupasaun ne’ebé reprezentante komunidade Ucekai no Mape hato’o mak kona-ba estrada, eletrisidade no bee-moos tanba, durante ne’e ukun aan, suku refere kontinua hela iha nakukun laran.

Read More

“Ami hakarak hato’o de’it ba Ministru Obras Públiku, maske la’o ba programa vasina nian, maibé tempu hanesan ministru mai, ami hato’o mós kona-ba kondisaun estrada, eletrisidade no bee-moos, tanba to’o agora komunidade seidauk asesu ba kestaun sira ne’e, ne’ebé ohin ministru mai direta ami-nia suku, ami sente kontetnti, tanba bele haree kondisaun estrada ne’e oinsa nomós eletrisidade. Tanba ukun aan tinan ruanulu resin ona, maibé ami seidauk sente ukun aan iha rai ida ne’e, maske suku seluk sente ona, maibé kuitadu ha’u-nia komunidade sira ne’e to’o agora nafatin de’it,” dehan Xefe suku Ucekai ne’e hafoin ministru Salvadór ba Ucekai, Ohin (07/10).

Hatan ba preokupasaun ne’e ministru Salvadór Pires sei haree hodi responde, maibé komunidade sira tenke partisipa uluk programa vasina, nune’e komunidade bele livre husi Covid-19.

“Ita-boot sira-nia dalan há’u haree kondiaun aat duni nomós eletrisidade, ne’ebé seidauk lakan, maibé há’u husu  ita-boot sira moris tiha lai mak rezolve, se ita boot sira la partisipa  programa vasina, dada ahi mai lakan no hadi’a estrada mak ema laiha, entaun halo nusa? ne’ebe imi tenke tuir vasina lai, se lae, dada ahi lakan no hadi’a estrada di’ak mós hanesan de’it, saugati tanba ema laiha no oinsa mak governu atu ukun no se? tanba ne’e mak tenke partisipa vasina para imi moris, nune’e imi bele asesu,” dehan Salvadór.

Governante ne’e promete sei hato’o preokupasaun comunidade Ucekai nian ba Institutu Jestaun no Ekipamentus (IJE) hodi haree.

“Tanba ha’u simu novidades ba estrada tinan ne’e nian iha teritóriu Timor laran tomak, há’u-nia proposta kilo atus lima passa, ne’ebé há’u haree to’ok Ucekai nian tama ka lae, tanba kilo atus lima ne’e kona estrada rural nian, tanba osan ne’e ita-nian, governu mak  tau osan rasik, ne’e la’ós ILO mak halo, ILO hodi halo dezeñu de’it, tanba ne’e há’u fila sei halo diskusaun kona-ba orsamentu, há’u tenke ba defende kilo atus lima ne’e tenke tama ba Parlamentu Nasionál, nune’e ita hein diskute iha ne’ebé no ita reza para sira PN labele koa,” katak Pires.(*)

Related posts