CJC Fasilita Formasaun LSBE Ba Foin Sa’e Iha Suku Ogues

Formador esplika hela ba juventude sira iha Suku Ogues Postu Administrativu Maucatar, tersa (12/10).

Tempotimor (Covalima)-Centru Joventude Covalima (CJC) fasilita formasaun Edukasaun Báziku Abilidade Moris (LSBE) ba foin sa’e sira iha sede Suku Ogues, Postu Administrativu Maukatar, Munisípiu Covalima.

Jestór Youth Interprenership CJC, Mateus Gonsalves hatete, formasaun ne’e, atu fasilita joven sira oinsa bele moris iha komunidade nia leet.

Read More

 “Formasaun ne’e Edukasaun Báziku kona-ba abilidade moris ba foinsa’e sira, iha ne’e sira aprende oinsá sai joven ne’ebé diak iha futuru no bele moris iha komunidade nia leet”, dehan Mateus iha Sede Suku Ogues, tersa (12/10).

Formasaun ne’e mós aprende matéria kona-ba isin lolon nian “Psikolójia” no edukasaun formal, noun formal, komunikasaun direta ho indireta, inklui publika informasaun husi mídia sosiál.

Formandu husi Aldeia Fohorua, Abelina Sandra Barros, sente orgullu ho formasaun ne’e, tanba bele hasa’e ona sira-nia koñesimentu kona-ba abilidade moris nian.

“Ha’u sente orgullu tebes ho formasaun ne’e, tanba bele hasa’e ona ami nia koñesimentu kona-ba abilidade moris nian. Esperiénsia ne’ebé ha’u hetan iha momentu ne’e sei passa fali ba ha’u-nia maluk joven sira atu sira mós bele komprende”, dehan nia   

Tuir planu formasaun ne’e realiza durante semana ida no sei hala’o iha suku sira seluk iha munisípiu Covalima. (*)

Related posts