Tempotimor (Covalima)-Ohin tersa (12/10) maizoumenus tuku 4 lokraik liu minutu balun kareta Polisia Nasionál Timor-Leste (PNTL) Eskuadra Postu Administrativu Zumalai, Munisípiu Covalima baku fila iha Suku Lepo.
Komandante PNTL Inspektur Postu Administrativu Zumalai, Antonio Soares informa, kareta refere ba hala’o operasaun iha Suku Lepo depois fila hetan asidente, tanba travaun mak la funsiona.
“Ohin kareta PNTL Postu Zumalai nian mak ba foti ekipa saúde sira vasina iha ne’eba, husi membru na’in 6 mak halo operasaun ka sek point ba kartaun vasinasaun ba Covid-19 hodi akompña ekipa saúde sira, tanba iha ne’eba halo vasina ba komunidade sira iha Suku Lepo, kareta ba foti iha ne’eba fila travaun la han hodi baku fila. Sira na’in 6 la kanek todan ka tohar”, Komadante Antonio informa ba www.tempotimor via telephone, tersa (12/10).
Kareta referee ema na’in 6 mak iha laran no akontese asidente ne’e laiha ema ida grave, maibe kondisaun kareta mak grave total.
“Kondisaun kareta labele la’o, tanba kareta kondisaun at totál no dadaun kareta sei para hela iha fatin akontesimentu hodi hein tránzitu sira ba sukat iha fatin akontesimentu,” dehan Komandante. (*)
