Tempotimor (Covalima)-Liga ba Eskola Bázika Filliál (EBF) Tudulpu ne’ebé suspende ona durante tinan rua mak komunidade Vicente da Costa husi aldeia Tudulpo, suku Beco husu Vise Ministru Edukasaun Juventude no Desportu (MEJD), António Guterres atu haree problema ne’e no reativa hikas prosesu aprendisajem.
“Señor vise ministru edukasaun, agora ami-nia oan sira eskola iha Gala la’o ain ho distansia kilómetru rua no liuhusi ai-laran de’it no agora ami-nia oan sira la eskola iha uma de’it, tanba eskola dook, depois tanba saida mak suspende eskola ne’e?,” dehan Vicente hafoin Vise MEJD ba hala’o kampaña vasinasaun iha aldeia Tudulpu, Tersa (19/10).
Hatán ba preokupasaun ne’e, vise MEJD, Antonio Guteres promete sei loke fila fali Eskola Básika Filial (EBF) Tudulpo iha suku Beco Postu Administrativu Suai.
“Ha’u simu ona informasaun katak, profesór na’in rua de’it, segundu eskola ida ne’e suspende provizóriu husi 2019 to’o ágora, ha’u mai iha tinan 2020 molok ha’u sai vise Ministru Edukasaun ne’ebé imi tenke kompriende, maibé eskola ida ne’e ha’u sei haree, ne’ebé imi labele preokupa, tanba ita nia administradór munisípiu Covalima mós iha ne’e kedas, ami na’in rua sei haree hamutuk hodi rezolve,” dehan vise MEJD.
Governante ne’e husu ba komunidade aldeia Tudulpo atu unidade no lian ida de’it hodi nune’e EBF bele reativa fali.
“Ha’u husu ita-boot sira iha aldeia Tudulpo iha uma ka’in 28 ne’e tenki unidade, labele kesar malu, tanba ha’u simu imformasaun balun dehan eskola iha Gala mak di’ak liu balu dehan iha ne’e mak di’ak liu, entaun husu ita-boot sira tenke liafuan ida de’it no husu imi uma-ka’in ruanulu resin ne’e halo karta ida inklui xefe aldeia, xefe suku ba to’o administradór postu no munisípiu ami prontu apoiu ita-boot sira,” nia komenta.
Entertantu observasaun www.tempotimor.com iha terrenu nota katak labarik ho idade sanulu resin la asesu edukasaun tanba distánsia husi aldeia ba eskola dook.(*)
