Mate ho Covid, Governu-Familia Halot Ona Matebian Norberto iha Ai-Oan

Pesóal Saúde halot hela mate isin, Norberto Inasio Ximenes iha semitériu públiku Ai-oan, kuarta (20/10). Foto Tempo Timor

Tempotimor (Covalima)-Matebian Norberto Inácio Ximenes ne’ebe mate ho Covid-19, Governu liuhusi Sala Situasaun Sentru Integradu Jestaun Krize (SS-SIJK) no Ministériu Saúde (MS) husi pilar VII (7) halo kolaborasaun servisu ho família hodi haloot ona iha semitériu públiku Ai-Oan, Suku Lalawa, Postu Administrativu Tilomar, Munisípiu Covalima

Kuarta-feira (20/10) ohin, ekipa seguransa husi SIJK dezloka matebian Norberto nia mate isin husi Izolamentu Vera Cruz Dili mai munisípiu Covalima hodi halo serimónia funerál tuir tradisaun Covalima nian, maibé kontinua kumpri protokolu Organizasaun Mundiál ba Saúde (OMS) nian.

Read More

Ba situasaun ne’e, www.tempotimor.com konfirma ho Diretór Servisu Saúde Munisípiu Covalima, Filipe Perreira Lemos, maibé nia parte seidauk hatene, tanba seidauk hetan kronolójia lolos husi koordenadór pilar VII nian.

“Kona-ba asuntu ne’e ha’u seidauk iha konsultasaun ho koordenadór pilar VII, tanba sira maka kaer kazu sira ne’e, ne’ebé há’u seidauk hatene lolos istória kona-ba moras ne’e,” dehan Filipe ba www.tempotimor.com via telefone, Kuarta (20/10).

Entertantu matebian Norberto Inácio Ximenes moris iha Ai-Oan, Suku Lalawa, Postu Administrativu Tilomar, Munisípiu Covalima iha loron 8 novembru 1989, nu’udar oan mane mesak husi Basílio Ximenes no Blandina Bui. Joven ne’e hakotu nia peregrinasaun iha izolamentu Vera Kruz bainhira hetan afetadu husi Covid-19 iha Segunda-feira (18/10/2020) semana ne’e.

Tuir observasaun jornalista iha terrenu nota katak, parte matebian iha kolaborasaun di’ak ho governu, tanba ne’e mate isin bainhira to’o iha nia rezidénsia deskansa de’it oras ida, depois ba halot kedas matebian iha semitériu públiku iha Ai-Oan. (*)

Related posts