Tempotimor (Covalima)-Maske ekipa perfurasaun husi kompañia Timor Resources preparadu ona atu halo perfurasaun ba mina matan Suai, maibé infelizmente to’o agora seidauk hahú tanba Autoriedade Nasionál Petroleum no Minerais (ANPM) seidauk fó lisensa.
Tuir Country Manajer Kompañia Internasional Timor Resource, Filomino Andrade katak, fatin konsentrasaun Haemanu suku Beko postu Suai prontu ona atu halo perfurasaun mina tanba ekipamentus hotu instaladu, maibé governu seidauk iha desizaun.
“Tuir ami-nia planu iha dia 12 ne’e halo perfurasaun, maibé la konsege tanba inspesaun ne’ebé ANPM halo seidauk finaliza, tanba ne’e ami seidauk halo iha tempu badak ne’e,” Hateten Filomeno ba www.tempotimor.com iha Beko, Kinta (21/10).
Country manajer ne’e akresenta, alende problema kona-ba lisensa problema seluk mak, membru governu ne’ebé atu partisipa iha lansamentu ne’e iha hela Dubai, entaun kontinua adia.
“ANPM nian hakarak mak halo perfurasaun ne’e hein prezidente ANPM ho tan ita-nia ministru balun iha Dubai, tanba ne’e entre dia 26 to’o 28 fulan outobru ne’e mak foin disponível atu mai haree perfurasaun iha ne’e,” nia informa.
Liga ba situasaun ne’e, Timor Resource espera mak governu no ANPN bele aselera lisensa inklui ho bainhira membru governu sira fila husi expo Dubai, atividade perfurasaun bele akontese.(*)
