Tempotimor (Covalima)-Liga ba planu no programa prefurasaun ba mina matan posu Feto Kmaus iha Covalima ne’ebé sei hala’o servisu perfurasaun husi kompañia Timor Resource, mak Autoriedade Nasionál Petróleum no Minerais (ANPM) emite ona lisensa hodi kontinua perfurasaun refere.
Tuir Vise Prezidente ANPM, José Gonçalves katak, ANPM aprova programa perfurasaun mina husi kompañia Timor Resource ho programa no dokumentu análiza segunransa inklui planu perfurasaun ba posu Feto Kamaus.
“ANPM aprovasaun ona programa importante ba perfurasaun husi kompañia Timor Resource, aprovasaun ida kona-ba dokumentu ba analiza seguransa ka indústria ne’e ita bolu safety keys nomós aprovasaun ida seluk mak programa no planu perfurasaun ba posu Feto Kamaus,” dehan Vise Prezidente ANPM, José ba jornalista sira, Ohin (25/10).
Prosesu aprovasaun ne’e lori tempu naruk, tanba natureza husi atividade perfurasaun mina no risku ne’ebe sei mai husi atividade husi perfurasaun mina bot tebes, tanba ne’e persiza ema hotu nia hanoin no peritus para tau hamutuk maneiras preventivas nomós maneiras mitigasaun sira, hodi responde ba kualker risku ne’ebé ita identifika nomós atividades asosiadu ho atividade perfurasaun ne’ebé hala’o.
“Esforsu tomak ne’ebé ANPM halo nomós kooperasaun lubuk ida husi emprezáriu Timor Resource dedika ona sira-nia empreza ne’ebé mai ho peritus lubuk ida, para atu responde komentáriu no avalisaun tékniku sira ne’ebé to’o ikus, ita bele to’o faze ida para emite aprovasaun importante rua ne’e ba Timor Resource,” nia dehan.
Nia mos dehan, “ohin no aban ita preprasaun, teknikamente lansamentu perfuasaun sei halo iha dia 27 semana ne’e, loron rua ba oin, ita sei hahú formalmente perfurasaun tuir planu ne’ebé aprovadu ona, depois sei iha atividade preprativus balu husi Timor Resource kona-ba fasilidade, tanba iha ne’e Timor Resource sei hamutuk ho Tmor GAP sei hahú atividade ne’e, ne’ebe sei akontese duni iha dia 27 de outubru iha posu Feto Kmaus,” katak, Vise Prezidente ANPM.
Lansamentu ba perfurasaun mina matan Feto Kmaus ne’e durante loron ruanulu nia laran depois halo fali avaliasaun kona-ba nia rezultadu. Tanba tuir planu ne’ebé submete mai ANPM iha loron 20 depois bele rona ona rezultadu no kontinua ba avaliasaun.
Dokumentu sira ne’ebé hetan aprovasaun ona husi ANPM ne’e sei fó dalan ba kompañia Timor Resource hodi ba oin atu halo servisu preprativu sira, ne’ebe sei halo lansamentu iha loron 27 Outubru 2021 semana ne’e. Tanba ne’e servisu husi sei implementa tuir aprovasaun ne’ebé ANPM emiti ona, nune’e hein katak, tempu badak bele fó rezultadu di’ak ba prosesu iha perfurasaun ne’e.
Entertantu vise prezidente ANPM, José Gonçalves iha segunda horseik entrega ona dokumentu safety keys nian ba manajer kompañia Timor Resource, Filomino de Andrade iha salaun Aeroportu Internasionál Komandante ein xefe Falintil, Kayrala Xanana Gusmão.(*)
