AA-Tradeinvest Sosializa Lei Investimentu ba Funsionáriu Alfándega iha Covalima

Diretór Aeroportu Internasional Komandante Em Xefe Kayrala Xanana Gusmão no Diretór Alfândega pontu entrada Salele, partisipa iha sosializsaun kona-ba lei investimentu janela úniku iha Salaun Fronteira Salele, Kinta (28/10). Foto Tempo Timor

Tempotimor (Covalima)-Kinta-feira (28/10/2021) ne’e, Autoridade Aduanéiru hamutuk ho Tradeinvest sosializa lei investimentu privadu ba funsionáriu alfándega iha portu entrada Salele-Covalima.

Ba jornalista sira, Jestór Diresaun Promosaun Investimentu husi Tradeinvest Timor-Leste, Silveiro Freitas katak, sosializasaun ne’e atu fasilita importasaun materál investimentu tuir lei investimentu privadu no.15/2017 katak, kompañia ne’ebé hetan sertifikadu investimentu sei hetan livre taxa aduanéira durante tinan ualu.

Read More

“Sosializasaun ba funsionáriu alfándega sira kona-ba implementasaun janela únika nian iha pontu entrada Covalima, nune’e atu fasilita importasaun materiais investimentu husi kompañia sira ne’ebé hetan ona sertifikadu husi Tradeinvest Timor-Leste atu nune’e bele hetan livre taxa aduanéira, ne’ebé oportunidade di’ak ba Timoroan inklui estranjéiru sira, karik investe iha Covalima para atu dezenvolve Suai di’ak liután no aproveita ho benefisiu ne’ebé governu fó liuhusi Tradeinvest Timor-Leste” dehan Silveiro iha Salele, Kinta (28/10).

Nia dehan, to’o agora Tradeinvest Timor-Leste seidauk simu pedidu ruma husi kompañia sira iha Covalima kona-ba atu hetan sertifikadu invéstimentu nasionál no internasionál.

“Agora ami seidauk simu pedidu investimentu ruma husi kompañia sira iha Covalima atu hetan sertifikadu investimentu nasionál no internasionál, tanba rekezitu prinsipál maka presiza legaliza ita-boot sira-nia kompañia iha Timor, depois maka bele aproxima no hato’o ita-boot sira-nia planu proposta investimentu ba Tradeinvest depois avalia, bainhira prienxe rekezitu ona mak governu liuhusi Tradeinvest atribui sertifikadu,” nia tenik.

Silveiro mós husu ba kompañia sira atu legaliza kompañia iha Timor-Leste hodi halo proposta investimentu atu nune’e Tradeinvest Timor-Leste avalia hodi atribui sertifikadu investimentu, nune’e hetan livre taxa aduanéira durante tinan ualu.

Iha fatin hanesan, diretór alfándega portu entrada Salele, Nuno Noguera apresia ba prezensa Autoriedade Aduanéira no Tradeinvest nian iha Covalima, tanba habelar ona informasaun ba funsionáriu sira kona-ba implementasaun janela únika nian.

“Ha’u apresia tebes ho ekipa nia prezensa mai iha munisípiu Covalima, tanba sira mai atu sosializa informasaun kona-ba implementasaun janela unika iha portu entrada ne’e,” Nuno tenik.(*)

Related posts