Tempotimor (Covalima)-Universidade Nasionál Timor Lorosa’e (UNTL) haruka tan estudante husi Fakuldade Medisina Siénsia no Saúde (FMSS), departamentu parteira hamutuk na’in 47 hala’o estájiu ka prátika iha Ospitál Referál Suai ba periodu 2021.
Iha serimónia solene ne’e, Pro-Reitór ba Asuntu Administrasaun, Planu no Finansas-UNTL, José Honório da Costa Perreira Jerónimo katak, estudante na’in 47 maka sei hala’o estájiu iha Ospital Referal Suai, maibé sei koloka estajiadu balun ba Sentru Saúde Zumalai hodi nune’e bele aprende di’ak liután iha área prátika nian.
“Universidade sempre haruka nia estudante sira ba hala’o estájiu, ne’ebé ida ne’e sira prátika um, dois no tres, ne’ebé tinan ida ne’e iha Covalima, estudante hamutuk na’in 47, maibé ba Sentru Saúde Zumalai estajiáriu na’in 18, atu nune’e oinsa sira bele aprende di’ak liután iha área prátika nian,” dehan Pro-Reitór José iha ORS, Kinta (28/10).
Iha momentu hanesan, Diretora Asisténsia Klínika Interina, Ospital Referal Suai, Henriqueta da Costa husu ba estajiadu sira atu aproveita didi’ak hodi aprende iha área prátika nian no disiplina hodi labele hafoer imajem UNTL nian.
“ORS ne’e odomatan nakloke ba estudante oan sira atu bele kontinua aprende kona-ba prátika nian, ne’ebé ha’u husu ba alin sira tenke aproveita oportunidade ho di’ak, tenke disiplina tanba horsida ema ida maka sala maibé ema temi UNTL nia naran, entaun ida ne’e hafoer ona eskola nia naran,” Henriqueta akonsella estajiadu sira.
Alende ne’e, Sekretáriu Administradór Munisípiu Covalima, Francisco Alves husu ba estajiadu sira atu serví ho fuan hodi uza matenek ne’ebé hetan ona iha banku universidade.
“Ha’u-nia mensajem ba alin estudante oan sira ne’ebé mai hala’o estájiu iha ne’e, servi ho fuan no uza matenek ne’ebé iha, tanba lor-loron sira sempre hasoru ema ne’ebé ho kondisaun moras,” katak Nia.
Enkuantu estudante hirak ne’e sei hala’o estájiu iha ORS no Postu Saúde Zumalai durante fulan tolu ne’ebé hahú 27 outubru 2021 no sei termina iha loron 31 fulan janeiru tinan 2022.(*)
