Tempotimor (Kovalima)-Administradór Postu Administrativu Suai, Luzinho do Rego triste ho kondisaun ponte Maliloi ne’ebé situada iha aldeia Samfuk, suku Kamanasa, postu Suai, tanba ukun-aan tinan ruanulu resin ona, maibé ponte ne’ebé kada tinan membru governu sira liu ba mai oin aat hanesan na’in laiha inklui nahe ho ai.
Administradór postu Suai husu parte relevante, atu hadi’a ponte refere, tamba ponte ne’e liga ba Zumalai no kapitál Dili.
“Ponte Samfuk ne’e ita hatama proposta apoiu emerjensia iha tinan 2019, hetan duni follow up di’ak tebes, aprovasaun ida urjentemente ajudikasaun direta, maibé ikus mai mudansa sistema política labele ajudikasaun direta, depois ami update fali informasaun husi ADN no Obras Públika sei hein fali liuhusi prosesu tenderizasaun normal, to’o agora ami update bebeik iha Obras Publika, sei haruka ba CNA depois ikus mais ADN sei verifika dadus final, maibé kleur ka lais sei hadi’a ponte refere, tamba ponte ne’e mak prinsipal liu, tanba liga ba dalan nasionál,” hateten APA Suai Luzinho iha nia servisu fatin, Segunda (08/11).
Lideransa postu Suai ne’e mós esforsu nafatin hodi hetan dalan liuhusi aproximasaun ho nível munisípiu no nasionál, nune’e bele responde iha tinan oin.
“Hanesan autoridade postu nafatin hato’o ba parte nível munisípiu depois pasa ba nível nasionál, nune’e molok tama 2023 bele hadi’a ona,” Nia otimista.
Liga ba kestaun ne’e, www.tempotimor.com tenta konfirma ho diretor obras públika Kovalima, maibé nia parte okupadu ho servisu nune’e labele resposta ba kestaun ne’ebé liga ho ponte Maliloi ne’ebé situada iha aldeia Samfuk.(*)
