Tempotimor (Kovalima)-Perfurasaun mina matan Feto Kmaus ne’ebé responsabiliza husi kompañia internasionál Timor Resource, laiha kuidadu nune’e mina-nia teen estraga komunidade aldeia Tabakolot, suku Debos nia to’os.
To’os na’in, Nazária Madeira katak, perfurasaun mina matan Feto Kmaus fó impaktu mai ami, tanba mina teen tama iha to’os laran nune’e labele halo ona to’os.
“Mina-rai ne’e iis maka’as no ha’u-nia to’os besik mina rai, agora ha’u atu halo to’os, sunu foer no batar kain sira ne’e labele, tamba mina-rai ne’e nia iis maka’as wainhira ha’u sunu mak da’et ba mina-rai ne’e ha’u mak sala ka kompañia mak sala,” dehan Nazaria ba jornalista sira iha nia to’os laran, Tersa (09/11).
Komunidade ne’e afirma, kona-ba mina teen ne’ebé tama ba to’os laran, nia parte sei tuur hamutuk ho família atu nune’e bele komunika ho manajer kompañia Timor Resource hodi buka solusaun.
“Agora Mina teen ne’ebé tama ba ami-nia to’os ne’e, ami labele halo ona to’os ne’e tamba ami kuda aihan mós la moris ona, tamba ne’e ha’u sei hato’o ba ha’u-nia oan sira atu nune’e ami familia ne’e tau hanoin hamutuk hodi komfirma ho kompañia nia boot hodi foti desizaun,” katak Nia.
Iha sorin seluk komunidade Xisto Gusmão ne’ebé hela besik perfurasaun mina matan Feto Kmaus hatete, durante loron tolu ona mak kompañia Timo Resource husik de’it mina foer ba mota no to’os laran.
“Durante loron tolu nia laran ona sira hetan mina, maibé mina foer ka mina teen ne’e sira husik hela ba kanu laran hodi suli liu ba mota, depois agora tempu udan hanesan ne mota lori hotu mina foer sira ne’e ba tasi entaun bele fó impaktu ba animal ki’ikoan sira no estraga ona biodiversidade tasi no mota, bele mós fó imapaktu ba komunidade sira ne’ebé hela no halo to’os besik, tanba mina nia iis maka’as,” Xisto konta.
Iha parte seluk, manajér Kompañia Timor Resource, Filomino Andrade katak, seidauk bele fó informasaun detallu ba públiku, tanba sei halo komunikasaun ho Autoriedade Nasionál Petróleum no Minerais (ANPM).
“Seidauk bele komentáriu ba media sira, ne’ebé ami sei diskuti uluk ho ANPM ho Timor GAP molok fó rezultadu. Kona-ba rezultadu mina, agora ita haree dadaun ho matan ne’e, iha área perfurasaun. Depois kona-ba preokupasaun husi komunidade nian, husu ba komunidade sira atu fó tempu ba ha’u-nia tékniku sira durante loron rua ka tolu hodi rezolve,” dehan Manajer Timor Resources.
Relasiona ho situasaun ne’e, www.tempotimor.com tenta komfirma ho Diretór Meiu Ambiente Munisípiu Kovalima, maibé diretór sei tuir hela enkontru iha iha nasionál, nune’e seidauk bele fo komentáriu.(*)
