MSSI: Feto no Labarik Presiza Hetan Protesaun

Diretór Servisu Solidaridade Sosiál no Inkluzaun ho Sosiedade Sivil no autoriedade seguransa foto hamutuk hafoin remata sorumutu iha kuartel jeral PNTL Kovalima, Kuarta (10/11).

Tempotimor (Kovalima)-Servisu Solidaridade Sosiál e Inkluzaun munisípiu Baukau no Kovalima hala’o sorumutu ho sosiedade sivíl no parte seguransa iha kuartel jerál Polísia Nasionál Timor-Leste (PNTL) munisípiu Kovalima hodi diskute kona-ba oinsa fó protesaun ba inan no labarik.

Diretór Servisu Solidaridade Sosiál no Inkluzaun munisípiu Baukau, Guido Ricardo Belo katak, husi enkontru ho autoridade seguransa no sivíl inklui parseiru sira hatudu dezafiu sira oinsa atu halo atendementu ba labarik no feto sira.

Read More

“Ita-nia objetivu enkontru ne’e mak oinsa bele halo atendementu ba ita-nia labarik feto minoridade sira, nune’e koopera ho seguransa PNTL no Sosiedade Sivíl sira hodi haforsa malu, nune’e ba oin bele servisu di’ak liután,” dehan Diretór Guido Ricardo Belo ba jornalista sira iha salaun kuartel jerál PNTL Suai, Kinta (11/11).

Iha sorumutu ne’e sekretáriu Administradór Munisípiu Kovalima (AMK), Francisco de Jesus Alves apela ba ekipa rede sira atu servisu maka’as no oinsa bele fó protesaun ba inan no oan bazeia ba igualidade jéneru.

“Rede feto sira tenke servisu maka’as, nune’e bele fó protesaun ne’ebe di’ak liután ba inan no oan sira bazeia ba ita-nia lei igualidade jéneru, nune’e bele redús númeru violénsia doméstika, violénsia sexuál iha ita-nia rain,” Hateten nia.

Komandante PNTL munisípiu Kovalima, Superintendente António Maria de Sá afirma, PNTL nia firmeza atu apoiu rede hodi prosesa kualker aktu sira ne’ebé kontra lei.

“Ami prontu apoiu no koopera ba rede sira no kulker aktu krime ne’ebé kontra lei mak akontese iha munispiu Kovalima,” nia informa.(*)

Related posts