Tempotimor (Kovalima)-Relasiona ho komemorasau loron Nasionál Juventude (LNJ), mak Sentru Juventude Kovalima (SJK) realiza semináriu ba juventude no estudante sira ho tema “juventude autór importante ba proteje Timor-Leste” hodi komemora loron nasional juventude ba Dala 16 no Masakre Santa Kruz ba dala-30.
Iha semináriu ne’e, Komandante Polísia Nasionál Timor-Leste (PNTL) eskuadra Suai, Cesilia de Jesus Amaral katak, juventude sira presiza sai autór ne’ebé transmite paz joven seluk.
“Alin sira husi semináriu ne’e hanesan bukae ne’ebé ita-boot sira hetan husi semináriu ida ne’e, Ita-boot sira fahe tutan ba juventude sira seluk labele hanoin atu halo komflitu, uluk joventude sira halo komflitu tanba hakarak ukun rasik aan hakarak kaer metin kuda talin iha Timor Leste,” Dehan Cesilia ba jornalista sira, ohin (12/11).
Iha Fatin hanesan reprezentante administradór munisípiu Covalima, Adjuntu administradór Francisco de Jesus Alves apresia tebes ba juventude sira, tanba husi juventude nia servisu no hanoin oinsa atu responde ba pandemia COVID-19 hodi ajuda pessoal saúde sira.
“Ha’u hanoin ba joventude munisípiu Kovalima, Ita-boot sira-nia servisu no hanoin atu responde ba pandemia ida ne’e, nune’e hodi administrasaun nia naran apresia tamba ita-boot sira-nia servisu maka’as tebes hodi apoiu ita-nia tiun maun mana sira iha saúde hodi kontra pandemia COVOD-19,” Nia espresa.
Nia mós agradese ba ekipa voluntária no média sira, maske la hetan sira-nia direitu, maibé sira prontu alista sira-nia aan iha liñaa frente.
“Tinan ida liubá ita-nia juventide sira halibur malu iha EKSES COVID20 nomós ita-nia média sira ne’ebé apoiu maka’as tebes luta kontra COVID-19, maske Ita-boot sira lahetan ita-boot sira-nia direitu, maibé ita-boot sira ho voluntariamente alista ita-boot sira-nia aan hodi duni moras aat ne’e husi ita-nia nasaun Timor-Leste, tanba ne’e apresia ba ita-boot sira no kontinua nafatin saida mak halo ona,” dehan Nia.
Autoriedade ne’e mós enkoraja ba juventude no estudante sita atu valoriza sobrevivente no veteranu sira ne’ebé uluk luta ba Timor-Leste nia determinasaun.
“Ha’u husu ba alin estudante nomós juventude sira atu valoriza ita-nia tiun ita nia aman no inan luta na’in sira, tamba nasaun boot ne’ebé dignifika nia erói sira tamba uluk sira luta la’ós de’it hasoru moras, Maibé sira hasoru mós kilat musan to’o sira-nia isin ne’e krekas ka kiik, Maibé sira nia pensamentu ba ukun rasik aan la ki’ik hanesan sira-nia isin,” hatutan Francisco.(*)
