Tempotimor (Kovalima) – Tribunál Distritál Suai (TDS), Munisípiu Kovalima halo primeiru interogatoriu ba argidu na’in-tolu ne’ebé Ministériu Públibku akuza ho krimi prostituisaun infantil no krimi violasaun seksual ba minoridade.
Na’in-3 ne’e, kompostu husi argidu ho inisial CG tinan 51, MDC tinan 47, no argida CDC tinan 30.
Tuir advogadu privadu, Escolatus Nunes katak, iha premeiru interogatóriu TDS fó medida koasaun prizaun preventiva ba nia klientes na’in-tolu, tanba akuzasaun ne’ebé ministériu públiku akuza ba nia klientes ho kazu ne’ebé previstu iha kodigu penal artigu 175 no violasaun seksual hasoru minoridade iha artigu 182.
“Akuzasaun husi ministeriu ba kliente iha ne’eba akuza ho krimi rua, krimi prostitusaun infantil no krimi abuzu seksual ba minoridade,”Imforma nia
Nia akresenta, tribunál fó despaisu ba judisiáriu ba argidu sira iha prosesu aplika medida koasaun tuir tribunal nia haree ne’ebé adekuada no asegura iha prizaun preventive.
Argidu na’in-tolu ne’e, antes PNTL kaptura iha suku Labarai Postu Suai, Munisípiu Kovalima ema na’in rua ne’ebé hanesan kazal ida, tanba fen no la’en ne’ebé deskonfia involve traviku umanu no ofrese mós fatin ba atividade prostituisaun no argidu ida seluk kaptura iha Suku Debos, Postu Suai, Munisípiu Kovalima. (*)
