Tempotimor (Kovalima)-Autoriedade Kovalima hanesan Servisu Solidariedade Sosiál no Inkluzaun (SSSI) Kovalima hamutuk ho Administradór munisípiu Kovalima apoiu tan fos saka 200 ba komunidade sira iha edifisiu administrasaun postu administrativu Fohorem.
“Husu ita-boot sira ne’ebé ohin simu fos iha fatin ne’e labele haree nia kuantidade, maibé oinsa mak ita-boot sira bele sustenta imi-nia uma laran durante loron haat ka lima nia laran, no agradese ba ita-nia Ministériu Solidariedade Sosiál, tanba iha tempu difísil hanesan ita Kovalima bele kontinua hetan apoiu ruma,” Hateten Administradór Munisípiu Kovalima, Francisco de Andrade iha postu Fohorem. Kuarta (17/11).
Diretór Servisu Solidaridade Sosiál no Inkluzaun, Agapito Assis husu ba autoridade postu to’o aldeia hodi identifika familia vulnerável, nune’e governu bele responde tuir kbiit governu nian.
“Apoiu ne’e sei kontinua ba ita-nia família kbi’it laek sira iha aldeia ba to’o postu, ne’ebé husu apoiu ba Nai xefe aldeia no xefe suku sira atu identifika sira,nune’e ita bele apiu ba sira ai-han hirak ne’ebé ita iha,” Nia dehan.
Alende ne’e, xefe suku Fohorem Fernando Ferreira, agradese ba apoiu refere tanba iha administradór atuál nia liderança mak povu Fohoren hetan beibeik apoiu.
“Agradese tebes ba ita nia administradór foun, nia servisu nomós solidariedade sosiál ba ita, tanba ita povu Fohorem kontinua hetan apoiu iha tinan ida ne’e nia laran,” Nia tenik. Entertantu apoiu ne’ebé ofrese ba povu Fohoren hanesan faze dala-5 iha tinan 2021, no apoiu ne’e sei atribui ba família uma-kain 50 iha kada suku, nune’e uma-kain 200 iha postu Fohorem mak sai benefisiáriu ba apoiu umanitáriu ne’e.(*)
