Tempotimor (Kovalima)-Liga ba polítika governu ne’ebé atu proteze komunidade husi pandemia COVID-19, mak pesoál saúde iha postu administrativu Fohorem kontinua buka no sona komunidade ne’ebé seidauk simu vasina.
Ba jornalista sira responsável ekipa vasinasaun postu Fohorem, Marito da Costa katak, sona komunidade iha to’os ne’e ho razaun komunidade iha postu adminitrativu Fohorem hotu tenki simu vasina kontra COVID-19, tamba komunidade barak mak seidauk simu vasina ho kompleitu.
“Objetivu ami buka komunidade iha to’os ne’e tamba ami halo atividade dor-to-dor ne’e ami to’o iha aldeia fatuk laran ami rona katak, komunidade sira halibur malu hotu iha xefe suku nia to’os entaun ami mai iha fatin refere ho razaun katak, ami-nia komunidade iha postu administrativu Fohorem hotu tenki simu vasinasaun kontra COVID-19, depois komunidade balun sedauk simu vasinasaun doze daruak no balu mós sedauk simu doze dahuluk,” dehan Marito ba jornalista sira iha to’os laran (18/11).
Nia aumenta, komunidade iha postu nee hotu hotu simu vasina, nune’e hasa’e sistema imunidade hodi kontra COVID-19, tanba dadaun ne’e postu Fohorem nia populasaun foin 90% de’it mak simu vasina.
Iha sorin seluk, xefe suku Fohorem, Fernando Fereira katak, durante ne’e autoriedade lokál servisu hamutuk ho pesoál saúde sira hodi forma ekipa liña frente ida ba kombate COVID-19 iha Kovalima.
“Nu’udar lideransa komunitária haree ba sira nia servisu ne’ebé hala’o bazeia ba orientasaun katak pesoál saúde sira hala’o knaar oinsa kolabora ho autoridade lokál no seguransa sira hodi forma liña frente hodi prevene COVID-19,” dehan xefe suku ne’e.
Autoridade komunitária mós apresia ba pesoál saúde, tamba esforsu an buka komunidade sira ne’ebé sedauk simu vasina no luta hasoru COVID-19.
“Fó apresiasaun ba pesoál saúde sira tamba sira luta hasoru COVID-19, sira nafatin esforsu aan hodi buka ema ne’ebé mak sedauk simu vasinasau, tamba ema balu ne’ebé sedauk simu vasinasaun ne’e mós bele fó impaktu ba ema seluk no sira rasik labele salva sira-nia an, di’ak liu simu vasina,” Fernando apresia.(*)
