KONSSANTIL Selebra Loron Mundiál ba Aihan iha Kovalima

Estudante sira partisipa hela iha seminariu kona-ba komemorasaun loron mundial ba aihan ne'ebe realiza iha Kovalima, Kuarta (24/11). Foto Tempo Timor

Tempotimor (Kovalima)-Governu liuhusi Konsellu Nasionál Seguransa Soberánia Alimentár no Nutrisional Timor-Leste (KONSSANTIL) Munisípiu Kovalima selebra loron mundiál ba aihan ho tema “Harii sistema aihan mais rezilénte atu hetan Timor-Leste nutritívu, saudável, no seguru”.

Diretór Agrikultura Munisípiu Kovalima, Zeferino Amaral hateten, objetivu husi komemorasaun ne’e atu fó importánsia ba aihan ne’ebé iha, tanba duránte ne’e to’os na’in sira maioria halo to’os no nata,r maibé iha obstákulu atu halo prosesamentu ba aihan ne’ebé atu sai kualidade.

Read More

“Komemorasaun ne’e oinsa valoriza ba ita-nia aihan rasik no saida maka ita kuda, ne’ebé eventu ne’e importante ba ita-nia agrikultór sira iha baze, dala barak agrikultór sira halo to’os ho natar, maibé iha obstakulu boot ida maka prosesamentu ai-han ne’ebé iha atu sai kualidade,” katak Zeferino liuhusi diskursu bainhira iha komeorasaun loron mundial ba aihan ne’ebé hala’o iha Suai, Kuarta (24/11).

Iha fatin hanesan Diretór Nasionál Seguransa ba Aihan, Rofino Soares Gusmão hateten, iha Timor-Leste kazu má nutrisaun sa’e maka’as ho pursentu 47%, tanba ne’e partisipante sira atu rona didi’ak nune’e bele  implementa iha moris loro-loron.

“Kazu má nutrisaun dalaruma sa’e maka’as iha suku no postu ne’ebé iha área remotas, iha Timor-Leste 47%, entaun iha selebrasaun ne’e la’ós ita mai tuur de’it, maibé tenke rona esplikasaun sira ne’e atu nune’e fila ba uma tenke implementa tuir nesesidade lor-loron nian,” dehan Diretór Nasionál ne’e.

Sekretáriu Administrasaun Munisípiu Kovalima, Francisco Alves mós promete sei apoiu servisu agrikultór sira iha Kovalima atu nune’e bele hasa’e produsaun aihan.

“Ita sei apoiu ita-nia servisu agrikultór sira iha Kovalima atu sira servisu maka’as liután hodi hasa’e produsaun aihan, tanba ita seidauk utiliza aihan sira ne’e ho di’ak, tanba ne’e presiza halo diversifikasaun ba aihan sira ne’e, labele hein han de’it,” katak Francisco.

Entretantu komemorasaun loron mundial ba aihan ne’ebé realiza iha Salaun Uma Feto Kovalima utiliza orsamnetu hamutuk rihun $5.150.00, no partisipa mai husi komandante PNTL Kovalima, ONG lokál no nasionál iha Kovalima, xefe suku sira no diretór liña sektorais, inklui estudante ensinu sekundáriu sira.

Iha komemorasaun ne’e, realiza mós atividade sira hanesan semináriu, espozisaun ba produtu lokál no kompetisaun kulinária.(*)

Related posts