SEF Salele Odamatan Nakloke ba Vítima Abuzu Sexuál

Madre Santina de Oliveira

Tempotimor (Kovalima)-Tuir Madre Santina de Oliveira katak, atu responde ba feto maluk sira ne’ebé hasoru problema iha teritóriu timor laran tomak, Sentru Esperansa ba Feto (SEF) iha Salele odamatan nakloke.

“Sentru esperansa Salele odamatan nakloke ba feto maluk sira iha ne’ebé de’it, ne’ebé hasoru problema, maske ho tipu kazu oioin, sira na’in hato’o keixa maka ami prontu akompaña sira, karik sira hato’o keixa ba parte relevante, ne’ebé iha ne’e kada tinan responde ba ema na’in 55 to’o 68 inklui ho sira-nia oan, sira mai ho tipu kazu oioin hanesan violénsia doméstika, abandona labarik sira, abuzu sexuál no kazu seluk iha teritóriu Timor laran tomak,” dehan Me. Santina ba jornalista sira hafoin reintegra vítima JMS ba familia iha suku Maudemo, postu Tilomar, Kuarta (01/12).

Read More

Madre ne’e esplika, bainhira tama iha Sentru Esperansa ba Feto iha Salele, atu halo akonsellamentu ba vitma sira ne’ebé hasoru problema no oinsa fila ba komunidade bele halo negósiu rasik no ativiadade oioin.

“Vítima sira ne’e mai fofoun ami halo rutina kada semana no fulan no tinan, husi atividade akonsellamentu ne’e mós ami apoiu ba vida esprituál hanesan fahe esperiénsia ba vida moris liga ho evanjellu nian, depois mós sira iha reza tersu lokraik no dader tuir misa no atividade seluk ne’ebé apoiu ba hakbi’it sira  mak ekonómia ba sira-nia futuru mak hanesan iha kustura ho makina, suku pontu kruz nomós ba iha hospitalidade hanesan halo dose, tein  ba área servisu feto nian ne’e sira halo hotu nomós área agrikultura  nian durante sira iha fatin ne’eba,” nia haktuir.

Enkuantu iha biban ne’e Madre Santina de Oliveira mós fó mensajen ba feto maluk sira iha teritóriu Timor laran tomak, iha ne’ebé de’it mak hasoru violénsia oioin, difikuldade ne’ebé hasoru labele tauk, tanba rede referál no organizasaun ne’ebé servisu hamutuk iha Kovalima prontu atu ajuda.(*)

Related posts