Tempotimor (Kovalima)-Prezidente Konsellu Munisipál Kombantentes Libertasaun Nasional (KMKLN) Munisípiu Kovalima, Osório Soares “Mausoko” husu ba joven no intelektuál sira iha Kovalima labele haree malu liu husi partidu, bainhira atu dezenvolve Kovalima.
“Ba maluk intelektual sira iha Kovalima tenke unidade, labele haree ba partidu, se imi haree ba partidu, se mak atu dezenvolve Kovalima ne’e lori ba Naroman? Ne’ebé husu ba juventude no intelektuál iha Kovalima, kuandu maun boot sira hemu tua iha Dili, ita Kovalima labele lanu,” dehan Prezidente KMKLN, Osorio “Mausoko” ba jornalista sira iha Suai, Ohin (08/12).
Nia mós husu ba intelektuál Kovalima atu labele implementa iha estrada ka polítika foer, maibé atu informasaun loos no klaru ba populasuan sira.
“Joven matenek sira, ko’alia buat loos ba populasaun sira, la’ós ko’alia buat ida mak “yang tidak tidak, aku tidak mau, Saya Kasih tau”? Uluk ha’u la ko’alia tanba ha’u-nia lutu laiha, maibé agora ha’u-nia lutu metin ona ne’ebé ha’u la tauk atu ko’alia,” katak Nia.
Atu aprende tuir maun boot sira iha nível polítika, tanba iha nivel altu ne’e bele hatene tiha ona labele implementa iha estrada laran, se imi implementa iha estrada laran, buat rua sei mosu mak santa kruz no ospitál.
Entertantu Prezidente KMKLN, Osório Soares “Mausoko” husu ba joven Kovalimaoan atu fó liman ba malu hodi kria unidade no Paz, hodi nune’e dezenvolve rai Kovalima, tanba agora katuas hotu ona ami nia esforsu mak buka dalan ohin loron ita hetan Indenpendénsia, ne’ebe dala ida tan tenke fó liman ba malu.(*)
