Tempotimor (Kovalima)-Relasiona ho loron boot ba Natal no tinan foun tinan 2022 besik ona, maka Komandante Polísia Nasionál Timor-Leste (PNTL) Munisípiu Kovalima, Superintendente Polísia, António Maria de Sá seidauk autoriza jovem sira atu tiru fugetes arbiru.
“Komandu iha ona planu operasaun no fó ona instrusaun ba Komandante eskuadra sira inklui unidade destakadu sira hanesan forsa sira ne’ebé hala’o knaar parte afastadu nian, agora atu tama ona loron boot Natal ho tinan foun, ne’ebé komandu seidauk autoriza atu hatama fugetes nomós tiru fugetes molok selebra Natal ho Tinan Foun,” dehan António ba jornalista sira, Ohin (07/12).
Komandante ne’e mós dehan, kona-ba asegurasaun ba loron boot ne’e PNTL preparadu ona.
“Hanesan lutu nasaun, forsa PNTL no F-FDTL preparadu, maibé la’ós hein loron boot de’it, loron babain mós preparadu, ne’ebé ami iha ona programa ba loron boot sira, ita prontu asegura no hanesan autoridade seguransa garante ba estabilidade seguransa rai laran atu nune’e srani sira expresa sira-nia direitu liberdade para festeza loron Natal ho Tinan Foun,” António hatutan.
Enkuantu dadaun ne’e iha Munisipiu Kovalima seidauk iha ema ruma maka tiru fugetes, tanba ne’e superintendente ne’e husu ba komunidade sira atu kontribui bainhira hetan ema ruma hatama fugetes iha Fronteira ho dalan ilegál tenke hato’o ba PNTL no autoridade lokál sira hodi nune’e bele prosesa.(*)
