Tempotimor (Covalima)-Aliansa Nasionál Kontrolu Tabaku (ANCT) hamutuk ho autoriedade munisípiu Kovalima realiza hodi semináriu hodi reforsa implementasaun lei kontrolu tabaku tanba timoroan mane pursentu 60% no feto pursentu 11% mak fuma sigaru.
Tuir dekretu lei nu. 14/2016, rejime kontrolu tabaku mak ANCT hakarak reforsa implementasaun artigu 5ª no 7ª husi dekretu lei ne’ebé proibidu fuma iha fatin públiku no espasu ba fumantes no sinalizasaun.
“Timor-Leste nasaun ida ne’ebé ho taxa fuma as iha mundu, ne’ebé ho prevalénsia pursentu 35.3%, ne’e inklui pursentu 60% husi mane no pursentu 11% husi feto ho idade 15 to’o 17, entre joven ho idade 13-15 ho pursentu 30.9% mak as liu iha rejiaun sudueste aziátiku. Alende ne’e pursentu 67 husi alunu sira mak sei nafatin horon sigaru suar iha uma no fuma tabaku pásiivu iha ema adultu sira ho idade 15 ba to’o 49 ho pursentu 69 ne’ebé hatudu prevalénsia fumantes pasivu as,” dehan Koordenadora Advokásia no Monitorizasaun Aliansa Nasionál Kontrolu Tabaku (ANCT), Dulce Maria Mendonça iha Covalima, Segunda (13/12).
Koordenadora ne’e mós dehan, iha semináriu ne’eekipa ANCT desimina hikas relatóriu survey husi fulan jullu iha Covalima ne’ebé fokus liubá iha Postu Suai Villa ba Autoridade sira iha Covalima.
Iha sorin seluk Sekretáriu Munisípiu Covalima, Fransisco de Jesus Alves katak, fuma sigaru ne’e perigu ba ema-nia vida no impaktu mós ekonómia iha rai laran.
“Há’u husu de’it maluk sira la’ós atu hapara, maibé tenke reduz. Tanba sigaru ne’e impaktu tebes ba familia uma laran nomós kolega sira iha kantor ne’ebé la fuma, depois ita ne’ebé iha fronteira sira katak, sigaru hotu tenke ho sticker Timor-Leste, maibé agora sigaru la ho sticker kontinua tama liuhusi fronteira, tanba ne’e há’u husu ba maluk alfándega sira atu kontrola sigaru ne’ebé husi Indonézia tama mai la ho stiker,” Nia husu.
Entertantu iha semináriu ne’e ANCT hamutuk ho autoriedade munisípiu Covalima husu ba sektorais sira hotu iha Covalima atu labele fuma iha fatin públiku hanesan iha edifísiu laran, iha motor no kareta laran.(*)
