Tempotimor (Covalima)-Tuir Administradór Postu Administrativu Suai, Louzinho do Rego iha entrevista dehan, iha administrasaun postu Suai, laiha fasilidade hodi halo servisu nune’e difikulta ba xefe sesaun sira.
“Dezafiu ne’ebé hasoru ita seidauk iha apoiu fasilidades logístika, liu-liu transporte no komputadór sira ne’ebé sufisiénte ba iha xefi seksaun sira ne’ebé eziste ona hodi atu hala’o sira-nia servisu la’ós iha postu de’it, maibé dezafiu ba iha suku sira liu-liu ba pesoál apoiu suku sira mós seidauk iha fasilidades ne’ebé naton hodi suporta iha servisu administrasaun nian,” katak Louzino do Rego ba jornalista sira iha nia knaar fatin, Kuarta (22/12).
Louzino salienta, dezafius hirak ne’e administratór buka ona solusaun maibé bazeia ba planu ne’ebé Ministériu Administrasaun Estatál (MAE) prepra ona.
“Dzafius ha’u hasoru ne’e ita buka ona solusaun tanba durante komputadór ba suku sira ne’e ita hotu akompaña bazeia ba planu husi Ministériu Adminiatrasaun Estatál (MAE) mak sei prepara katak iha tinan ida ne’e bele to’o ona iha suku ida-idak,” tenik Louzino.
Administradór ne’e mós dehan, bazeia ba planu iha tinan 2022, mak oinsa atu responde nesesidade báziku komunidade, liu-liu ba komunidade sira ne’ebé seidauk asesu bee-mos bele estabele sistema bee-mos no adekuadu estrada rurál.
“Iha tinan 2022 ita hakarak atinje responde nesesidade báziku ba komunidade, liu-liu komunidade sira seidauk asesu sistema bee-mos ne’ebé di’ak, ita bele estabelese ona sistema bee-mos adekuadu ba komunidade sira atu nune’e komunidade sira labele halerik ba bee-mos no estrada rurál sira ne’ebé postu Suai nia komunidade sira infrenta,” nia dehan.
Entretantu atu atinze planu hirak ne’e administradór postu Suai haruka ona karta ba Ministériu Kompetente liuhusi programa ILO R4D no orsamentu ba tinan 2022 aprova ona husi Parlamentu Nasionál (PN) maibé seidauk promulga husi Prezidente Repúblika (PR) atu implementa programa hirak ne’e.(*)
