Tempotimor (Covalima)-Tuir segundu Komandante Polísia Nasionál Timor-Leste (PNTL) Munisípiu Covalima, Superintendente Asistente Polísia Albino Mouzinho apresia ba komunidade Covalima tanba iha loron natal hakat ba tinan foun laiha kazu ruma mak akontese iha munísipiu Covalima.
“Agradese ba ita-nia joven no kristaun sira hotu iha Covalima, tanba laiha kazu asidente ka insidente ne’ebé boot iha Covalima tomak,” hateten Superintendente Asistente Polísia Albino iha Salaun PNTL Covalima liuhusi konferénsia imprensa, Segunda (27/12).
Nia afirma, iha duni kazu ki’ik sira maibé komandu PNTL hasai kedas karta sirkular ba OPS no komunidade iha postu hitu.
“Iha duni insidente ki’ik sira hanesan ema lanu, maibé komandu hasai kedas karta sirkular ba komunidade no hato’o mensajen ba iha postu administrativu nomós Ofisiál Polísia Suku (OPS), ne’ebé komunidade ka joven sira la lanu iha estrada públiku. Ita-nia joven sira hemu duni, maibé laos hemu iha estrada públiku, sira hemu iha sira-nia uma rasik ne’ebe la iha problema,” dehan Nia.
Segundu komandante ne’e mós husu ba komunidade sira atu sunu fugetis wainhira iha kalan fahe malu tinan 2021 no hakat ba tinan foun 2022, maibé ba loron babain seguransa sei la tolera nomós sei la tolera ba se de’it mak lanu iha estrada públiku.
Enkuantu seguransa iha munisípiu Covalima PNTL ho F-FDTL servisu hamutuk hodi halo seguransa ba to’o tinan foun hodi kontrola iha suku ka kapela sira ne’ebé halo misa hodi selebra ba tinan foun no kona-ba iha fronteira rai no tasi Unidade Patrollamentu Fronteira (UPF) no Unidade Polísia Maritima (UPM) kontinua halo seguransa.(*)
