Tempotimor (Covalima)-Atu prezerva no salva guarda kultura Timor-Leste nian iha futuru, maka Diretór Jerál (DJ), Manuel Ximenes Smith husi Sekretáriu Estadu Arte no Kultura (SEAK), rekomenda ba Autoridade Munisípiu Covalima atu oferese salaun Uma Feto Covalima ba Arte no Kultura, atu nune’e sai Sentru Kulturál Munisipál.
“Iha oportunidade ida ne’e atu husu fatin ne’e “Uma Feto Covalima” sai sentru kulturál ba munisípiu Covalima, ne’ebé ami sei halo proposta ne’ebé karik bele fatin ne’e oferese ba arte kulturál para iha futuru bele sai sentru ida,” katak DJ SEAK ne’e liuhusi diskursu, Tersa (28/12).
Ba kestaun ne’e, reprezentante Administradór Munisípiu Covalim (AMC), Francisco Mendonça “Tatamero” aseita maibe prezisa halo pedidu ba administrasaun munisípiu atu nune’e bele analiza molok entrega ba SEAK.
“Fatin ida ne’e edifísiu antigu ho naran “Gedung Wanita” atu sai fali sentru kulturál iha Covalima, ida ne’e ami aseita, maibé tenke halo karta ka pedidu ruma ba administradór munisípiu depois nia haree oinsa bele haruka ba iha Diretór Jerál Arte no Kultura nian,” dehan Tatamero iha salaun Gedung Wanita ne’e.
Entretantu salaun Uma Feto Covalima “Gedung Wanita” ne’e konstroi iha tempu Indonézia nian, nune’e edifísiu refere hola parte iha patrimóniu kulturál no patrimóniu istóriku.(*)
