Tempotimor (Covalima)- Primeiru Ministru (PM), Taur Matan Ruak presiza resolve aeroportu komandante en-xefe Kay Rala Xanana Gusmão iha Munisípiu Covalima, nakfilak ba kampu manu lin.
“Ha’u hakarak hato’o de’it kona-ba preokupasaun Munisípiu Covalima nian, tanba ohin sua exelensia Primeiru Ministru mai la’o tuir auto estrada haree kapas, maibé durante ita nia viajen la hasoru kareta ida, ita gastu orsamentu boot, maibé la funsiona no Aeroportu ne’e ho nia kondisaun kapas tebes, maibé aviaun ami la hetan, so ita hetan de’it manu lin mak barak, ne’ebé ami husu Primeiru Ministru atu haree no rezolve mós kona-ba kestaun ida ne’e,” Administradór Munisípiu Covalima, Fransisco de Andrade, hatete iha Aeroportu Suai, tersa (11/01).
Maske hato’o preokupasaun ne’e, maibé Primeiru Ministru laiha resposta ruma.
Entertantu, tuir sensus tinan 2015 nian populasaun iha Munisípiu Covalima hamutuk ema na ’in-82.312, ne’ebé kompostu husi mane 41.425 no feto 40.887.
Populasaun Covalima moris vida Agrikultura ho porsentu 87 no totál funsionáriu rejime jerál ema na’in-274 ne’ebé kompostu husi mane 233, feto 41.
Kargu diresaun setorais hamutuk ema na’in-76 no sefe departamentu ho Diretór servisu munisipais iha funsionáriu kontratu na’in-118 no agente administrasaun iha 47. (*)
