Lidera Komandu PNTL Covalima, Basílio Lakohi Membru Hakenek Komunidade

Komandante PNTL Munisipiu Covalima foun, Superintendente Polisia Basilio de Jesus. Kinta (13/01). Foto Tempo Timor

Tempotimor (Covalima)-Komandante Polísia Nasionál Timor-Leste (PNTL) Munisípiu Covalima, Superintendente Basílo de Jesus alerta ba membru hotu katak, servisu ho profesionál, nune’e labele uza armas hodi hakanek joven no hasoru komunidade sira.

“Uza forsa asaun últimu desizaun, bainhira ita-nia aan rasik hetan amesa no ema liur hetan amesa ne’e mak foin últimu desizaun, la’ós aos uza kualker tempu, la’ós uza forsa hakanek ita-nia joven sira, la’ós uza forsa hodi hakanek ita-nia komunidade sira, iha ha’u-nia prezensa ha’u lakohi ida ne’e,” dehan Komandante PNTL munisípiu Covalima, Superintendente Basílio de Jesus iha Suai, Kinta (13/01).

Read More

Komandante ne’e afirma, durante lodera komandu munisípiu Covalima, sei iha programa importante haat ne’ebé sei ajusta iha servisu Konselu Polisiamentu Komunitária (KPK) no servisu Ofisiál Polísia Suku (OPS), atu nune’e oinsa eleva kapasidade hodi kria amizade ho jovem sira.

“Ha’u-nia prezensa iha komandu ida ne’e, ha’u sei lori programa haat maka prioridade, ida maka ita sei halo ajustamentu servisu KPK ho OPS nian atu nune’e eleva kapasidade oinsa bele kria amizade ho povu sira iha fatin ne’ebé ita servisu ba,” dehan Basílio.

Eleva mós kapasidade patrollamentu ka ajusta ho polísia tránzitu rodoviária hodi servi povu ho dignu.

“Ita mós sei eleva kapasidade patrollamentu ajusta ho Polísia tránzitu rodoviária hodi servi povu ho dignu, la’ós uza farda ho pistola tebe arbiru komunidade sira, ne’e sala. bainhira tun terenu tenke hatudu atitude di’ak atu nune’e povu sira bele dehan ita-nia servidór sira mai ona,” nia enkoraja membru sira.

Alende ne’e nia mós sei fortifika servisu informasaun no investigasaun atu identifika kulaker aktus ne’ebé mosu iha rai laran liu-liu iha munisípiu Covalima.

“Sei fortifika servisu informasaun no investigasaun hodi bele deteta kualker aktus ne’ebé mosu iha rai laran liu-liu iha munisípiu ne’e, dalaruma tempu kalan ema hakarak toba hakmatek, entaun grupu provokatór sira maka ita-nia tarjetu ba servisu,” nia dehan.(*)

Related posts