Tempotimor (Covalima)-Relasiona ho polítika oitavu governu konstituisionál nian ne’ebé atu konstroi tan Uma Kbiit Laek (UKL) ba família vulnerável sira no kada suku sei konstroi uma sia to’o sanulu iha tinan 2022, mak ekipa Programa Nasionál Dezenvolvimentu Suku (PNDS) hahú sosializa matadalan implementasaun atividades PNDS nian ba autoridade suku no liñas sektorais sira iha Munisípiu Covalima.
“Atividade ba ohin loron ne’e atu partilla informasaun liu-liu liga ba implementasaun PNDS ba tinan ida ne’e, tanba tinan 2022 ne’e hanesan PNDS regular faze 3 siklu 4, Bee-moos, kontinua rehablitasaun sede suku no kontinua implementasaun Uma ba Kbi’it Laek (UKL) iha teritóriu laran tomak inklui munisípiu Covalima,” dehan Ofisiál PNDS Nasionál, Constantino Ribeiro iha Suai, Tersa (18/01).
Nia afirma, implementasaun Uma ba Kbi’it Laek (UKL) iha Covalima ba 2021 antinji ona 80%.
“Kona-ba implementasaun UKL iha tinan kotuk nian liu-liu ba munisípiu Covalima há’u hanoin ida ne’e besik ona atu remata, no atinji ona pursentu 80%-resin, ne’ebé implementasaun ne’e agora dadaun faze finalizsaun, tinan ida ne’e governu kontinua tau osan ba UKL iha teritóriu Timor-Leste tomak,” katak Constantino.
Entretantu UKL ba tinan 2021 nian ne’e konstroi iha munisípiu Covalima hamutuk 90, ne’ebé dadaun ne’e prosesu tomak liu ona pursentu 80%.
Alende ne’e, partisipa iha sosializasaun matadalan ba implementasaun atividade PNDS ba tinan 2022 ne’e mak Administradór Munisípiu Covalima, Sekretáriu Administrasaun, Komandante PNTL Munisípiu Covalima, Superintendente Polísia Basílio de Jesus, administrador postu administrativu Suai no reprezentante sekretáriu tékniku PNDS nasionál.(*)
