Tempotimor (Ainaro)-Bee tudak Doko-Mali ne’ebé lokaliza iha suku Nunumoge, postu Hatubuiliku, munisípiu Ainaro hahú atrai atensaun turista lokál no internasionál nian tanba husi nia paisajem ne’ebé furak no atrativu tebes.
Tuir observasaun www.tempotimor.com iha sítiu turistiku ne’ebé katak, iha fim semana timor nia ema sira husi fatin no munisípiu oioin halo vizita ba sítiu komunitáriu refere no lori reseita ba Micael.
Tuir komunidade Micael de Araújo husi Aldeia Debulau, Suku Nunumoge, postu administrativu Hatubiliku, Munisipiu Ainaro sente kontente tebes tanba iha fim de semana ema sempre vizita fatin refere.
“Sábadu no Domingu mak ema vizita barak loos, kuandu sábadu ne’e ami bele hetan to’o $50.00 dolar amerikanu, maibé iha loron Domingu ami bele hetan $60.00 to’o $70.00 dolar, ne’ebé fulan ida ne’e ami hetan rihun rua resin,” dehan Micael de Araújo ne’ebé hamutuk ho juventude seluk hodi dezenvolve fatin refere. Tersa (25/01).
Micael afirma, osan sira ne’ebé hetan dezenvolve hikas fatin turizmu refere no apoiu ba oan sira-nia eskola.
“Osan sira ne’ebé ha’u hetan husi vizitante sira ne’e ha’u hodi hola pregu no fó joven sira loron ida dolar lima hodi ta’a ai para halo pagar no seluk haruka ha’u-nia oan sira eskola no sustenta nesesidade ha’u-nia familia nian,” nia tenik.
Iha sorin seluk juventude Ventonito de Carvalho Mau husi munisípiu Covalima sente kontenti no apresia ba komunidade no joven sira ne’ebé Ainaro ne’ebé iha interese hodi halo dalan dezenvolve fatin ne’e hodi vizitante sira bele haree natureza bee Doko-Mali nia furak.
“Ha’u apresia tebes ba joven no komunidade sira ne’ebé halo dalan halo ema barak mak vizita fatin ne’e no fatin refere atrai duni ema hodi halo refresing iha lorin ferias, tanba ne’e ha’u husu ba parte relevante ba oin fatin ne’e halo di’ak liután, nune’e sai furak hodi bele lori turista sira husi rai liur mai,” katak Ventonito.
Entertantu husi ezisténsia sítiu turizmu komunitáriu Doko-Mali ne’e Micael konsege rekolla ona osan husi vizitante sira kuaze rihun $4.000-resin ona husi turizmu lokál no internasionál.(*)
