Laiha Orsamentu Rasik, Difikulta Servisu Alfandega iha TL

Tempotimor (Covalima)-Tuir komisáriu Alfandega Covalima, José Abilio katak, daudaun ne’e Alfandega seidauk iha orsamentu rasik, tanba ne’e sei depende ba orsamentu diresaun jeral servisu korporativu nian.

“Difikuldade durante ne’e alfandega hasoru la’ós iha Covalima de’it, maibé difikuldade ita bele konta alfandega em jeral, autoridade tomak tanba ita iha limitasaun, agora daudaun alfandega mós seidauk iha orsamentu rasik, maibé sei depende ba orsamentu diresaun jeral servisu korporativu nian, ne’ebé dalaruma alfandega atu bele responde ba nesesidade urjente ruma sei iha difikuldade,” dehan Komisariu Alfandega José Abilio ba jornalista sira hafoin hala’o limpeza iha igreja Ave Maria Suai, Sesta (28/01).

Read More

Nia subliña, kuandu alfandega iha orsamentu rasik bele ajuda ona alfandega hodi bele kompleta rekezitus sira hanesan ekipamentu komputardór sira ne’ebé agora instala ona makina X-Ray, nomós ba tinan ne’e sei iha makina X-Ray body Scan atu instala.

“Atu kompleta tan ekipamentus balun atu lori deteta materiál kontra bandu sira bele lori ajuda funsionáriu alfandega sira hodi hala’o knaar di’ak liután ho profesionál.

Komisáriu ne’e akresenta, liga ba transporte sira, iha governu ne’e mudansa polítika no tau kareta sira iha fatin determina ona, maibé liga ba servisu intelijénsia iha liña fronteira presiza no tenke responde situasaun balun ho urjente.

Nia hatutan, maske polítika governu nian halo mudansa, maibé alfandega sei ko’alia fali oinsa buka solusaun ida atu nune’e servisu alfandega nian bele la’o nafatin liliu ba halo kontrolu, ba halo vizilánsia hodi halo atuasaun ba atividade ilegál sira ida ne’e tenke maka’as liu hodi kombate atividade ilegais sira ne’e.(*)

Related posts