Tempotimor (Covalima)-Relasiona ho komemorasaun tinan 22 ba Autoriedade Aduaneira Alfandega Timor-Leste mak governu liuhusi Ministériu Finansas (MF) rekoñese servisu Alfandega nian fuan domin ba Timor-Leste mezmu hasoru laloran oioin.
“Hodi governu nia naran hakarak hato’o agradesimentu ba Komisáriu no funsionáriu Autoridade Aduaneiru Alfandega nian sira hotu ne’ebé komemora loron aniversáriu ba dala-22 no selebra loron Alfandega Internasional ba dala 70. Ita nasaun ne’ebé ke sei joven, ha’u louva ho servisu autoridade aduaneiru nian, maske tinan kotuk moras COVID-19 tama iha Timor, maibé sira servisu kontinua hodi halo nia servisu fronteira funsiona normal,” Hateten Ministeriu Finansas Rui Agusto Gomes iha Suai, Sesta (29/01).
Iha Fatin hanesan sekretáriu Administrasaun Munisípiu Covalima, Fransisco de Jesus Alves husu ba autoridade aduaneira sira atu kaer metin prinsísiu sira ne’ebé iha, atu nune’e bele susesu iha servisu fatin.
“Ha’u fó mensajen ba funsionáriu alfandega katak, persiza kaer metin no integridade profesionalizmu no respeitu, buat haat ne’e mak kaer metin ba oin ita boot sei susesu iha ita-boot sira-nia servisu fatin, ne’ebé husu ita-boot sira kaer nafatin prinsipiu ne’e,” Francisco enkoraja.
Entertantu Komisáriu Autoridade Aduaneira José Abilio agradese tanba iha selebrasaun tinan-22 ne’e Autoriedade Aduaneira no Alfandega bele realiza atividade oioin.
“Aniversáriu Alfandega Timor-Leste nian ba dala-22 ne’e durante loron lima (25-28/01/2022), kria atividades jogu desportu Voleibol feto no mane, futebol no basketbol. Alende ne’e halo sosializasaun ho patrullamentu iha postu fronteira sira, misa aradesimenetu no vizita instalasaun sira ne’ebé destakadu iha postu fronteira sira no ikus fahe premiu ba jogadór sira ne’ebé sai vensedór ba atividades refere,” nia dehan.
Entretantu iha selebrasaun tinan-22 ba Autoriedade Aduaneira Alfandega Timor-Leste ne’e governu hamutuk ho Alfandega no funsionáriu sira kari mós aifunan iha monumentu Setembru Negro Suai.(*)
