Tempotimor (Covalima)-Relasiona ho anin boot ne’ebé akontese iha Covalima kuarta-feira (02/02/2022) horseik rezulta uma rua iha aldeia Natardik, suku Datotolu, postu administrativu Fohorem hetan estragus total.
Ba Jornalista sira, Anibal dos Santos nu’uda vítima ba dezastre ne’e katak, akontesimentu anin sobu uma ne’e akontese maizumenus iha tuku rua kalan hodi estragus uma no dapur, nune’e ba dadaun ne’e sei hela ho vijinu sira.
“Jam 2:00 kalan mak anin boot loke uma rua no ami-nia dapur sira ne’e, ne’ebé agora ami sei hela hamutuk ho família vijinu sira iha ne’e, ne’ebé se bele husu ba parte relevante tau matan ba ami, nune’e ami bele hetan ajuda ruma husi sira, kalan akontese ne’e xefe Aldeia iha ne’e, ne’ebé haree kedas anin sobu uma ne’e,” Hateten Anibal jornalista sira iha nia kua, Kinta (03/02).
Iha okaziaun ne’e, xefe aldeia Natardik, Jorge dos Santos Pereira katak, uma rua mak hetan estragus husi akontesimentu anin boot ho velosidade ne’ebé maka’as.
“Iha foho ne’e anin boot maka’as, ne’e mak sobu uma rua ne’e inklui dapur sira ba hotu, ne’ebé ha’u hato’o ona ba xefe suku no xefe suku mós haree kedas akontesimentu anin sobu uma ne’e,” nia tenik.
Entertantu totál membro husi família rua ne’e hamutuk ema na’in 11 no ba dadaun ne’e provizóriu hela ho vijinu.(*)
