Tempotimor (Covalima)-Komisaun Nasionál ba Eleisaun (CNE-Sigla Português) hahú prepara Ofisiál Supervizaun Eleitorál (OSE) na’in 94 ne’ebé pasa iha tinan 2021 liubá komesa tuir ona formasaun hodi prepara no koloka ba sentru votasaun sira iha postu hitu, munisípiu Covalima.
Tuir Diretór CNE Munisípiu Covalima, Hermengildo de Sena katak, dadaun ne’e pesoál OSE tuir ona formasaun, atu nune’e bele hatene lala’ok eleisaun nian bainhira iha ona faze votasaun.
“Dadaun ne’e CNE Covalima rekruta Ofisial Supervisaun Eleitoral hamutuk 94 ne’ebé liu iha intervista sei koloka ba sentru votasaun iha postu hitu no suku tolu nulu liliu sei koloka ba sentru votasaun sira iha Covalima,” hateten diretór ne’e ba www.tempotimor.com iha nia knaar fatin, Kinta (03/02).
Diretór CNE hatutan, durasaun kontratu ba Ofisiál Supervizaun Eleitorál ba na’in 94 ne’e durante fulan tolun ne’ebé hahú husi kampaña to’o votasaun.
“Durasaun servisu ba kontratadu sira durante fulan tolu de’it, karik iha eleisaun Prezidente iha segundu volta, ami sei extende tan sira-nia kontratu ba funsionáriu kontratadu sira ne’e,” nia tenik.
Alende ne’e Diretór CNE munisípiu Covalima ne’e mós imforma katak, segunda-feira semana oin sei realiza programa edukasaun sívika ba artes marsiais tolu hanesan PSHT, KORK no IKS iha Covalima hodi partisipa iha eleisaun demokrátika ne’ebé sei akontese iha marsu 2022.(*)