Tempotimor (Covalima)-Tuir Diretora Servisu Saúde Munisípiu Covalima (SSMC), Maria de Fátima Moniz katak, to’o ohin SSMC rejista ona kazu dengue hamutuk 72 no hamate ona ema na’in tolu.
“Kazu dengue ne’ebé ita rejista iha munisípiu Covalima janeiru 27 to’o fevereiru 2022 ne’e hamutuk kazu 72, ne’ebé afeta liu ba labarik sira ho tinan 10 mai kraik no labarik na’in-3 mak lakon ona vida tanba mai ho kondisaun grave,” informa Diretora Maria ba jornalista sira iha nia knaar fatin, Kuarta (09/02).
Intervensaun ne’ebé husi saúde munisípiu Covalima halo mak fumigasaun ba iha área sira ne’ebé afetadu hodi rezulta labarik na’in-3 mate tanba afeta husi moras dengue, nomós halo abatisasi ba iha área sira ne’ebé sai hanesan akontese surtu iha munisípiu Covalima. inklui servisu hamutuk ho autoridade lokál hodi halo limpeza jerál liliu ba fatin públiku sira hanesan merkadu, hamoos foer iha valete kuak sira para hamenus susuk sira ne’ebé lori moras dengue ba labarik sira.
Kazu dengue ne’ebé Servisu Saúde Munisípiu Covalima rejista maioria husi postu administrativu Suai, Maucatar no Tilomar.
Alende ne’e, problema ne’ebé durante ne’e ospitál hasoru mak komunidade liliu ba inan-aman sira lori oan sira tarde ba iha fasilidade saúde, tanba komunidade sei falta koñesimentu ba iha sintomas moras dengue tan ne’e sira tarde lori oan mai fasilidade saúde hodi rezulta labarik na’in-3 lakon vida.
“Sintoma ba moras dengue baibain ne’ebé mosu mak hanesan isin manas maka’as, malirin ka bee doko, laran sa’e muta hela de’it no kuandu grave liu mosu sintomas hanesan isin kafuak mean iha liman no isin lolon nomós bele akontese hemorozia iha ibun, inus, matan no tilun,” nia esplika.(*)
