Sidadaun Dupla Eleitorál, Francisco: “Lei La Bandu”

Diretor STAE Munisipiu Covalima Fransisco Gusmão ko'alia ho Jornalista sira iha nia servisu fatin. Tersa (08/02). Foto Tempo Timor

Tempotimor (Covalima)-Maske ohin loron sidadaun sira iha Timor-Leste balun dupla ona kartaun eleitorál, maibé to’o agora laiha lei ida mak regula ka bandu sidadaun sira.

Tuir diretór Sekretariu Tékniku Administrasaun Eleitorál (STAE), Munisípiu Covalima, Francisco Gusmão katak, durante ne’e STAE identifika sidadaun Timoroan iha Covalima hamutuk na’in-11 mak dupla kartaun eleitorál, maibé STAE laiha lei ruma mak bandu sidadaun sira.

Read More

“Ita konsege rejista sidadaun mane na’in hitu no feto na’in haat ne’ebé hamutuk na’in-11 mak dupla kartaun eleitorál, maibé lei ruma la bandu,” dehan Diretór STAE Munisípiu Covalima, Francisco ba jornalista sira iha nia servisu fatin, Horseik (08/02).

Timoroan ne’ebé dupla kartaun eleitorál ne’e, laiha lei ruma atu regula sira, maibé tuir lei eleitorál katak, ema na’in ida iha direitu kartaun eleitorál ida la’ós rua.

“Agora ha’u seidauk hatene loloos kona-ba lei ne’ebé atu regula sidadaun ne’ebé dupla kartaun eleitorál, maibé klaru ema eleitór ida kaer de’it númeru eleitorál ida labele kaer eleitorál rua, ne’ebé STAE identifika hetan ema sira ne’e iha dupla kartaun eleitorál, tanba iha ema na’in ida hetan kartaun eleitorál husi munisípiu Covalima no kartaun eleitorál ida fali nia hetan iha munisípiu ka kapital Dili ida ne’e mak hatudu ema na’in ida bele iha kartaun eleitorál rua,” nia informa.

Diretór STAE ne’e mós subliña, durante ne’e indentifika mós kona-ba ema sira ne’ebé mate ona hamutuk ema na’in rihun 1.454 kompostu husi mane na’in-725 no feto na’in-729.(*)

Related posts