Tempotimor (Covalima)-Relasiona ho deklarasaun inan faluk Adelina de Lima kona-ba Uma Kbi’it Laek (UKL) ne’ebé la hetan rejistu husi ekipa verifikadór Programa Nasionál Dezenvolvimentu Suku (PNDS) maka Administradór Munisípiu Covalima (AMC), Fransisco de Andrade ho ‘hirus’ hodi dehan sei la toleta ba funsionáriu PNDS ne’ebé destakadu iha postu administrativu FatuLulik no ekipa verifika sira iha suku sira refere.
“Se ema ne’e merese hetan tenke hetan duni, labele politiza UKL sai fali ba polítika ne’e labele, ne’ebé agrdese ba ita boot média, tanba bele fó informasaun ida ne’e, nune’e ha’u bele tun direta ba terenu, hodi bele haree direta fatin ne’e no agora kedas ha’u orienta ba administradór postu Fatululik hodi haree ema ne’e, se funsionáriu mak servisu laloos tenke fó sansaun,” Hateten AMC Fransisco iha servisu fatin, Segunda (21/02).
Administradór alerta ba ekipa labele halo politiza ba kritéria ka formatu ne’ebé iha atu la’o tuir.
“Dalaruma mós funsionáriu balun ne’ebé mak tun iha ne’ebá ne’e halo politiza ba sasan ne’e hotu, maibé UKL ne’e lahare ba partidu A ka B, Se de’it mak tama kritéria ne’e, nia merese duni atu hetan, tanba ne’e mak tinan ne’e difrente ho tinan uluk, tinan ida uluk 2021 suku ida hetan de’it uma tolu, maibé tinan 2022 ne’e suku ida hetan to’o uma sia ka sanulu, ne’ebé ha’u husu administradór postu sira halo kedas intervensaun kona-ba UKL ne’e,” Nia aletra.
Nia hatutan, funsionáriu ne’ebé halo servisu laloos sei fó sansaun, tanba servisu la bazeia ba kritéria ne’ebé iha.
“Tenke fó sansaun duni ba funsionáriu PNDS no pontu fokál ne’ebé iha suku ne’e, tenke fó sansaun duni, tanba sira la utiliza kritéria ne’ebé iha. funsionáriu ne’ebé ulun toos hanesan ne’e fó nia naran mai. tanba kbi’it laek la hetan, ema ne’ebé loke kios gelera no uma diak ne’e mak hetan fali,ema ne’e iha osan nusa mak sei tau nia naran tan.?tanba uma ida ne’e fo duni ba ema kbi’it laek.,Hakotu Administradór Munisípiu Covalima.
Entertantu relasiona ho Notisia Inan faluk la registu hetan UKL ne’e, Administradór Munisípiu Covalima Fransisco de Andrade Kontaktu direta Kedas liu husi telefone ba Administradór Postu Fatululik,atu tun terenu hodi halo intervensaun direta UKL.
Deskonfia Mosu Diskriminasaun UKL Iha Fatululik – Tempo Timor Suai
