Tempotimor (Covalima)-Relasiona ho servisu ekipa verifikadór ba Uma Kbi’it Laek (UKL) iha suku Taroman, halo Administradór Postu Administrativu (APA) Fatululik, José Afonso la satisfas tanba ema ne’ebé merese ba UKL la hetan, maibé ema ne’ebé uma di’ak mak hetan fali.
“Momentu ekipa verifikadór sira foti dadus ne’e ha’u seidauk toma posse, ne’ebé ekipa verifika foti dadus ne’e antes ha’u toma posse, ne’ebé kona-ba señora Adelina de Lima nia uma ne’e, ha’u simu informasaun husi Administradór Munisípiu no orienta kedas ha’u ba hareee direta uma señora Adelina de Lima nian no ema ne’e merese duni hetan Uma Kbi’it Laek, nomós ida tan señora Jacinta Hoar mós merese hetan, maibé tamba saida mak sira la hetan,” dehan APA Fatululik, Jose Afonso ba www.tempotimor.com iha knaar fatin, Kuarta (23/02).
Administradór ne’e afirma, problema ne’e la’ós akontese de’it iha suku Taroman, maibé iha suku Fatululik mós hanesan to’o komunidade ne’ebé uma aat ne’e ekipa la verifika sira-nia uma.
“Iha suku Fatululik mós hanesan, ema ne’ebé uma pondasi halo hotu ona no batako mós iha ona atu halo uma ida ne’e hetan fali, ema ne’ebé uma aat ne’e la hetan, ne’ebé tenke re-verifika fali dadus ne’ebé laloos ne’e, tanba ema ne’ebé uma aat no no uma du’ut iha postu Fatululik ne’e la hetan, sira ne’ebé uma di’ak no família kompletu no loke kios ne’e mak hetan, ne’ebé ohin ekipa husi PNDS sa’e ba atu re-verifika ba kbi’it laek sira ne’e,” nia tenik.
Administradór postu ne’e mós rekoñese katak, señora Adelina la’ós veteranu no hein uma lisan ne’e temporáriu de’it, tanba ne’e husu ekipa verifikadór iha suku labele hareee ba buat seluk maibé hareee ema-nia kondisaun no uma uma.
“Ita labele haree ba ema ne’e nia veterana no nia ne’e hein uma lisan, ita haree ba ema-nia forsa ne’ebé laiha atu halo uma ne’e, tanba señora Adelina de Lima la’ós veterana foin rejistu no hein uma lisan ne’e nia sementara de’it ne’ebé ha’u ladun satisfas ne’e tamba sa ida? tamba ema ne’ebé merese hetan UKL ne’e la hetan ne’e mak ha’u la satisfaz, hanesan señora Adelina no señora Jacinta Hoar, ne’ebé ha’u la dun konkorda ho ekipa verifikadór sira nia servisu,” katak nia.
Autoriedade postu ne’e mós husu ba parte ekipa Programa Nasionál Dezenvolvimentu Suku (PNDS) atu re-verifika kbi’it laek iha postu Fatululik.
“Ha’u-nia hakarak ne’e tenke re-verifikasaun duni, se ita husik hanesan ne’e de’it ema ne’e hatoman an ka kebihasaan ne’ebé tenke re-verifika duni ba kbi’it laek uma-ka’in haat ka lima ida iha postu administrativu Fatuluik ne’e,” nia hakotu.(*)
