Tempotimor (Covalima)-Komandante Polísia Nasionál Timor-Leste (PNTL) Munisípiu Covalima Superintendente, Basílio de Jesus, husu ba membru Polísia sira hotu inklui unidade destakadu sira iha Munisípiu Covalima hanesan Unidade Espesial Polísia (UEP), Unidade Patrullamentu Fronteira (UPF) no Unidade Polísia Maritima (UPM) atu hatudu kapasidade ho karakter profesionál.
“Ohin ita fó apelu no orientasaun ba membru polísia sira hotu oinsa atu hatudu ita-nia kapasidade atu asegura iha eventu ida ne’e ho karakter profesionál firmeza, neutro, imparsiál, ita hanesan ajente seguransa fó garantia máximu, la fó espasu ba se de’it, inimigu se de’it, grupu se de’it atu destroi estabilidade sa tan iha momentu kampaña ida ne’e” dehan Komandante Basílio liuhusi diskursu hafoin realiza formatura jerál iha Komandu Jerál PNTL Covalima, Tersa (01/03).
Tempu ona polísia atu hatudu kapasidade no imparsialidade, boa vontade, amizade ho ema tomak katak, polísia mós bele sai servidór ida atu fó garantia seguransa ba ema hotu jeralmente própriu ba eventu kampaña dentru periodu loron 2 to’o 16 marsu eleisaun ne’ebé monu iha 19 de marsu 2022.
Membru PNTL sira servisu hamutuk ho juventude sira, hamutuk ho sidadaun iha rai Covalima odi fó seguransa ba festa demokrásia ida ne’e para bele la’o ho di’ak.
“Polísia sei la la’o mesak, tanba komunidade tomak ba seguransa ida ne’e, joventude tomak fó apoiu seguransa ba ida ne’e, komponente hotu inklui autoridade lokál liliu komandu polísia munisípiu Covalima ida ne’e no aman veteranus sira hamrik iha kotuk hodi reforsa no enkoraza, nune’e metin hodi garantia seguransa komunidade tomak iha rai Covalima ida ne’e,” nia tenik.
Komandante ne’e mós relasa, formatura ohin realiza hodi relembra fila-fali hanesan ajente seguransa nein pasu ida atu hakiduk, nein pasu ida ida atu fó vantajem ba individu ka grupo ne’ebé iha interese polítika atu destroi estabilidade nasionál própriu iha munisípiu Covalima.
“Husu sidadaun hotu iha munisípiu Covalima atu fó kontribuisaun ba paz, atu kontribui seguransa sai interese ema hotu nian, seguransa sai fatór determinante ba nasaun ida ne’e nia dezemvolvimentu no estabilidade,” katak Koamndante ne’e.
Entretantu hafoin remata formatura iha komandu PNTL Munisípiu Covalima, membru sira husi unidade Tránzitu, Task Force, Ofisiál Polísia Suku (OPS) no unidade destakadu sira iha Covalima hanesan UPF, UPM no UEP hala’o Show Force (hatudu forsa) ka simulasaun no halo konvoiu tama sai suku no aldeia sira hodi hatudu ba komunidade katak PNTL prontu atu fó seguransa ba iha kualker tempu no espesiál ba iha kampaña ElPres.(*)
