Tempotimor (Covalima)-Tuir Diretora Ezekutiva NGO Action for Change Foundation (ACF), Verónica de Souza katak, molok ACF implementa atividade iha munisípiu Covalima, hahú tenke introduz ba autoridade postu administrativu no xefe postu saúde hitu.
“Objetivu enkontru ohin ho ita-nia Autoridade Postu Administrativu hitu, xefe postu saúde hitu, Joventude no Komunidaade sira atu identifika apoiu ba NGO atu hamutuk auditória sosiál kona-ba prestasaun servisu saúde munisipál nian,” Hatete Diretora Ezekutiva ACF, Veronica ba jornalista sira, Kinta (03/03).
Nia hatutan, atividade ACF nian sei foka liu ba programa Auditória Sosiál ba sentru postu saúde sira iha Postu.
“ACF ne’e foin eziste ne’ebé tenke halo enkontru uluk hodi introdúz ba ita-nia autoridade sira, nune’e ami hahú ami-nia atividade karik autoridade sira hatene no planu ba oin, ohin ami identifika hamutuk ho ita-nia autoridade postu sira, ne’ebé ami sei fokus liu fó formasaun espesífiku ba auditória sosiál ba juventude ne’ebé identifikadu hamutuk ho NGO ACF ne’ebé postu saúde identifika tiha ona inklui foku mós ba rekursu umanu hanesan infermeiru no infermeira nomós fasilidade iha Postu sira,” Nia tenik.
Iha sorin seluk reprezentante Administradór Munisípiu Covalima (AMC), Fransisco Tatámero apresia ba Organizasaun Naun Governentais (ONG) ACF nia prezensa iha munisípiu Covalima.
“Ha’u apresia ho imi-nia prezensa ohin loron introdúz imi-nia instituisaun nia programa ne’e, nune’e mai Covalima kontinua servisu hamutuk ho di’ak iha postu sira,” Hakotu nia.(*)
