Tempotimor (Covalima)-Komisaun Nasionál ba Eleisaun (CNE) identifika funsionáriu barak partisipa iha kampaña eleitorál bainhira kandidatu Prezidente Repúblika (PR) ho númeru Sorteiu 6, Francisco Guterres “Lu Olo” hala’o kampaña ba dalalima iha munisípiu Covalima.
“Dadaun ami haree hela funsionáriu sira ne’ebé mak partisipa iha kampaña ami toma nota hodi relata ba iha komisáriu hodi buka solusaun,” Diretór CNE Munisípiu Covalima, Hermenegildo de Sena ba jornalista sira bainhira halo observasaun kampaña iha Kampu Ladi, Segunda (07/03).
Bazeia ba estatutu Komisaun Funsaun Públiku (KFP), bainhira funsionáriu sira hola parte iha kampaña eleitorál sira hato’o pedidu ba KFP, tenke husu lisensa anuál no lisensa ne’ebé lahó vensimentu.
“Funsionáriu sira hato’o pedidu ba iha KPF ami CNE sempre iha dokumentu maibé durante ne’e ami la asesu dokumentu ba funsionáriu sira ne’ebé hato’o ka husu pedidu ba iha KFP,” nia dehan.
Nia hatutan, funsionáriu ne’ebé partisipa iha kampaña durante oras servisu mak funsionáriu sira husi Administrasaun Munisípiu Covalima, diretór sira, funsionáriu Servisu Edukasaun munisípiu covalima no Administradór Munisípiu Covalima no postu administrativu.
Iha komísiu ne’e hetan supervizaun husi Komisaun Nasionál Eleisaun, Provedoria Direitu Umanu no Justisa (PDHJ) no obervadór internasionál hodi haree prosesu hotu, inklui Lei Eleitorál nian hodi bele fó susesu ba iha kampaña tinan ida ne’e.(*)
