Tempotimor (Covalima)-Maske governu Timor-Leste esforsu tebes atu adere ba Asean, nune’e negosiante sira bele hola parte iha merkadu livre, maibé negosiante lokál kontinua sai penonton ba área negósiu nian, tanba Xineza domina merkadu hotu.
Tuir negosiante lokál Maria Seu katak, negosiante lokál dalabarak faan sasan iha de’it loron sábadu bainhira tempu bazár, entaun xineza sira loke loja boot iha Suai vila ikus mai sasan lokál ne’ebé faan iha merkadu la folin, tanba ema hobur hotu sasan xineza nian.
“Ami triste tebes, tanba loron tomak ami tur ema la hakbesik aan ba ami-nia sasan no ema ida nunka mai husu ami nia sasan ne’e hira? ne’e mós lae, ema sira hobur mak xina sira-nia sasan iha sorin ne’e, ne’ebé ba oin ne’e ita rai na’in ne’e sai oinsa los? Nia dalan mak ita sai penonton no hobur ema nia sasan ne’e, hanesan ema xineza futu manu,” Hateten negosiante Maria ba www.tempotimor.com iha merkadu Camanasa, Tersa (08/03).
Negosiante ne’e komenta, iha tempu sira liu ba kotuk, produtu lokál folin, maibé agora la folin tanba xina fa’an hotu.
“Uluk la hanesan ne’e, ami kuandu husi foho tun mai ami-nia Aifarina tunu, talas, modo no brinkedus sira ne’e ema mai hola kedas, la to’o tuku 11h:00 ami-nia sasan hotu ne’ebé fila mós sedu, maibé agora lae, ne’ebé husu ba boot sira se bele xina sira labele naran faan sasan ne’ebé ami bele fa’an ne’e, ida hanesan rinso no sabaun oan sira ne’e, ami mós bele fa’an, maibé agora xina okupadu hotu ne’e, ami atu halo nusa, agora ita ukun aan fali ita na’in sai penonton no hobur fali ema husi rai liur ida nian mai,” tenik nia.
Parte relevaante presiza haree kestaun ne’e, tanba sei hamate ekonómia familia nian inklui timor nia ekonómia rasik.
“Tuir loloos ne’e sira mai fa’an mak kareta ho motor no sasan kontrusaun sira ne’e, maibé ida ne’e terbalik fali, ita fa’an buat ki’ikoan ne’e sira mós mai fa’an buat sira ne’e hotu, ne’ebé ami-nia fatin hanesan ne’e ema la hola, tanba fatin la sufisiente,” nia hakotu.(*)
