Tempotimor (Covalima)-Ekipa verifikadór husi Sekretariadu Sekretariadu Tékniku Administrasaun Eleitotal (STAE) munisípiu Covalima, komesa detekta buletim de votus balun labele uza iha tempu votasaun tanba foer no nakles ona.
Ba kestaun ne’e Diretór STAE Munisípiu Covalima, Francisco Gusmão katak, buletim de votus hamutuk 138 labele uza iha tempu votasaun tanba foer ona.
“Bulentm de votus iha follas rua mak nakles husi parte sorin, balun foer no balun tinta kona, ne’ebe follas hamutuk 138 mak ami identifika ho karimbu hodi la uza,” dehan Diretór STAE Covalima ne’e ba www.tempotimor.com iha knaar fatin, Tersa (15/03).
Liga ba notísia husi Rádiu Televizaun Timor-Leste Empreza Públika (RTTL, EP) diretór STAE konsidera laloos, tanba laiha follas de votus mak kuak.
“Informasaun RTTL,EP fó sai kuak ne’e laloos, ohin ami-nia diretór jerál STAE mós kontaktu kedas ha’u, ne’ebé ha’u dehan follas 138 mak identifika kona tinta no foer, ne’ebé dala ida tan 138 ne’ebe kuak kedas ne’e lae, laloos, ne’ebé 138 follas ne’e labele lori ba sentru votasaun,” katak Nia.
Nia mós husu ba públiku atu labele fiar informasaun kona-ba follas de votus 138 ne’ebé RTTL,EP fó sai katak kuak.
Entretantu livru buletim de votus ne’ebé husi nasionál haruka ba munisípiu Covalima hamutuk rihun 1.070, no kada livru iha follas de votus 50. Nune’e husi total livru ne’e follas de votus hamutuk rihun 52.500 ba munisípiu Covalima, maibé follas de votus hamutuk 138 labele uza iha tempu votasaun tanba konsidera aat ona. Alende ne’e totál eleitór iha munisípiu Covalima ne’ebé sei ezerse funsaun iha loron 19 Marsu semana ne’e hamutuk rihun 47.807.(*)
